ក្រសួងអប់រំអំពាវនាវឱ្យគ្រឹះស្ថានសិក្សាពង្រឹងនិងលើកកម្ពស់ការសិក្សាវប្បធម៌-អរិយធម៌ខ្មែរ

ភ្នំពេញ៖ ក្រសួងអប់រំ នាថ្ងៃទី១៥ មីនា បានចេញសេចក្ដីណែនាំស្តីពី ការពង្រឹងនិងលើកកម្ពស់ការសិក្សាវប្បធម៌-អរិយធម៌ខ្មែរ ដើម្បីបណ្តុះ និងពង្រឹងស្មារតីស្នេហាជាតិឱ្យកាន់តែខ្លាំងក្លា ព្រមទាំងចូលរួមអភិរក្ស និងលើកកម្ពស់វប្បធម៌ជាតិខ្មែរឱ្យបានគង់វង្សនិងរីកចម្រើនថែមទៀត។

បើតាមសេចក្ដីណែនាំ ក្រសួងអប់រំ ស្នើអោយគ្រប់គ្រឹះស្ថានសិក្សាសាធារណៈ និងឯកជន ត្រូវចាត់ចែងរៀបចំ និងរកឯកសារពាក់ព័ន្ធនឹង ការពង្រីកចំណេះលើផ្នែកវប្បធម៌-អរិយធម៌ ក៏ដូចជារៀបចំយន្តការចូលអាន និងសិក្សាក្នុងបណ្ណាល័យ ដោយចែកវេន ឬរៀបកាលវិភាគឱ្យបានច្បាស់លាស់ និងបង្កលក្ខណៈងាយស្រួលក្នុងការអាន សិក្សា និងស្រាវជ្រាវ ដោយមានការដឹកនាំនិងសម្របសម្រួលសិក្សា ដោយគ្រូឈរថ្នាក់ ឬគ្រូឯកទេសភាសាខ្មែរ អក្សរសាស្ត្រខ្មែរ និងសិក្សាសង្គម។

បន្ថែមពីនេះ គណៈគ្រប់គ្រងសាលា និងលោកគ្រូអ្នកគ្រូ ត្រូវជំរុញសិស្សឱ្យចូលខ្ចី និងបំផុសឱ្យសិស្សរកជាវសៀវភៅទាំងនេះយកទៅអាននៅផ្ទះ ដោយគ្រូដាក់បញ្ហា ដូចជាសំណួរ ឬលំហាត់ និងធ្វើការត្រួតពិនិត្យ កែលម្អនាពេលបន្ទាប់។ រៀបចំចេញវិញ្ញាសាប្រឡងប្រចាំខែ ប្រឡងឆមាស និងប្រឡងថ្នាក់ជាតិ ក្នុងមុខវិជ្ជាភាសាខ្មែរនិង អក្សរសាស្ត្រខ្មែរ និងសិក្សាសង្គម៕