Yearendyearend1140x150
Img 0571

បុគ្គលិកធនាគារ អេស៊ីលីដា ជាង៦០០នាក់ចូលរួម«បរិច្ចាគឈាម»ជួយជនរងគ្រោះនិងអ្នកជំងឺ

សង្គម
/
អ្នកយកព័ត៌មាន:
ស៊ីស៊ីថាមស៍
/
ថ្នាក់ដឹកនាំ និង បុគ្គលិកគ្រប់លំដាប់ថ្នាក់ នៅការិយាល័យកណ្តាល និង សាខាជុំវិញរាជធានីភ្នំពេញរបស់ធនាគារ អេស៊ីលីដា នៅថ្ងៃទី ៦ មីនា ២០២៣ បានចូលរួមបរិច្ចាគឈាមដោយស្ម័គ្រចិត្ត។

ភ្នំពេញ៖ ថ្នាក់ដឹកនាំ និង បុគ្គលិកគ្រប់លំដាប់ថ្នាក់ នៅការិយាល័យកណ្តាល និង សាខាជុំវិញរាជធានីភ្នំពេញរបស់ធនាគារ អេស៊ីលីដា ប្រមាណជាង ៦០០នាក់នៅថ្ងៃទី ៦ មីនានេះ បានចូលរួមបរិច្ចាគឈាមដោយស្ម័គ្រចិត្ត ដើម្បីជួយសង្គ្រោះជនរងគ្រោះ និង អ្នកជំងឺដែលត្រូវការឈាម។នេះជាលើកទី៦ហើយដែលធនាគារ អេស៊ីលីដា ដឹកនាំបុគ្គលិកចូលរួមបរិច្ចាគឈាម ខណៈតម្រូវការឈាមនៅកម្ពុជាមានប្រមាណជា ២០០ប្លោកជារៀងរាល់ថ្ងៃសង្គ្រោះជនរងគ្រោះ និងអ្នកជំងឺ។

ដូចការគ្រោងទុកនៅថ្ងៃទី ៦ មីនានេះ កម្មករនិយោជិតធនាគារ អេស៊ីលីដា គ្រប់លំដាប់ថ្នាក់ នៅការិយាល័យកណ្តាល និង សាខាជុំវិញរាជធានីភ្នំពេញជាង ៦០០នាក់ បានបន្តចូលរួមបរិច្ចាគឈាម ដើម្បីរួមចំណែកក្នុងសកម្មភាពសង្គម និងមនុស្សធម៌ សម្រាប់បំពេញ តម្រូវការកង្វះឈាមក្នុងការជួយសង្គ្រោះអាយុជីវិត ជូនដល់មជ្ឈមណ្ឌលជាតិផ្តល់ឈាម សម្រាប់ជួយ​សង្គ្រោះជនរងគ្រោះ និងអ្នកជំងឺដែលត្រូវការឈាមជាចាំបាច់ ជាពិសេសសម្រាប់ជួយជីវិតមនុស្សដែលត្រូវការសង្គ្រោះបន្ទាន់។

ក្នុងចំណោមជាង៦០០នាក់នោះ គឺមាននៅភ្នំពេញចំនួន ២៣០នាក់ សម្រាប់កម្មករនិយោជិត ធនាគារ អេស៊ីលីដា នៅតាមបណ្តាសាខាខេត្តមានសរុបចំនួន ៣៧២នាក់ ក្នុងនោះ ស្រ្តីមានចំនួន ១០៦នាក់ ក៏បានចូលរួមបរិច្ចាគឈាមនៅតាមមន្ទីរពេទ្យបង្អែកនៃខេត្តនីមួយៗផងដែរ។

លោកស្រីវេជ្ជបណ្ឌិត មើក សាមាន អនុប្រធានមជ្ឈមណ្ឌលជាតិផ្តល់ឈាម បានមានប្រសាសន៍ថា សកម្មភាពបរិច្ចាគឈាមដោយស្ម័គ្រចិត្តរបស់ក្រសួង ស្ថាប័ន ក្រុមហ៊ុន និងប្រជាពលរដ្ឋ បានចាប់ផ្តើមផុលផុសបណ្តើរៗ ឡើងវិញហើយ បន្ទាប់ពីស្ថានភាពជំងឺកូវីដ-១៩ បានធូរស្រាលរួចមក។សម្រាប់លោកស្រី នៅកម្ពុជាបច្ចុប្បន្ននេះ មិនទាន់មានឈាម ដែលមានប្រភពពីអ្នកស្ម័គ្រចិត្ត គ្រប់គ្រាន់សម្រាប់ជួយសង្គ្រោះជីវិតមនុស្ស ដែលត្រូវការ ឈាមបន្ទាន់នៅឡើយទេ។

បើតាមលោកស្រីវេជ្ជបណ្ឌិត មើក សាមាន ក្នុងមួយថ្ងៃគ្រាន់តែនៅរាជធានីភ្នំពេញ ត្រូវការឈាមប្រមាណ ១៥០ប្លោក ហើយនៅទូទាំងប្រទេសត្រូវការឈាមប្រមាណ ២០០ប្លោក ជារៀងរាល់ថ្ងៃ ដូចនេះ យើងត្រូវការឈាមបន្ថែមទៀត ដើម្បីសង្គ្រោះជីវិតមនុស្សបន្ទាន់។ លោកស្រីវេជ្ជបណ្ឌិត បន្តអំពាវនាវទៅកាន់ប្រជាពលរដ្ឋខ្មែរទូទាំងប្រទេស ជាពិសេសក្រុមយុវជន មេត្តាចូលរួមបរិច្ចាគឈាម ដើម្បី យកទៅជួយជនរងគ្រោះ ដែលត្រូវការឈាមជាចាំបាច់ ហើយសកម្មភាពទាំងនេះ ពិតជាបានចូលរួមចំណែក យ៉ាងខ្លាំង លើការជួយសង្រ្គោះជីវិតមនុស្ស។

គួរបញ្ជាក់ថា នេះជាលើកទី៦ហើយដែល ធនាគារ អេស៊ីលីដា រៀបចំការបរិច្ចាគឈាម ជួយសង្គ្រោះជនរងគ្រោះ និងអ្នកជំងឺដែលត្រូវការឈាម ដើម្បីព្យាបាលជំងឺ។ ការចូលរួមបរិច្ចាគឈាមដោយស្ម័គ្រចិត្តចំនួន ០៥ដងកន្លងទៅរៀបចំឡើងកាលពីថ្ងៃទី០៥ ខែមេសា ឆ្នាំ២០១២ ថ្ងៃទី២៧ ខែមករា ឆ្នាំ២០១៦ ថ្ងៃទី០៣ ខែកុម្ភៈ ឆ្នាំ២០១៧ ថ្ងៃទី០២ ខែកុម្ភៈ ឆ្នាំ២០១៨ និង ថ្ងៃទី២៥ ខែមករា ឆ្នាំ២០១៩៕


ផ្ទាំងពាណិជ្ជកម្ម
Img 4048
Photo 2023 06 28 13.36.05
Photo 2022 10 27 10.25.23
Khcct banner

អត្ថបទទាក់ទង