កំពង់ស្ពឺ៖អភិបាលខេត្តកំពង់ស្ពឺលោក វ៉ី សំណាង នៅថ្ងៃទី ១ មីនានេះ បានសម្រេចប្រគល់ម៉ូតូមួយគ្រឿងជូនដល់កីឡាករ ព្រំ សំណាង សម្រាប់ជាមធ្យោបាយធ្វើដំណើរក្នុងការហ្វឹកហាត់ ដើម្បីក្លាយជាកីឡាករអាជីព sea games។នេះជាការលើកទឹកចិត្តមួយសម្រាប់កីឡាករកម្ពុជាព្រំ សំណាង ក្នុងអាជីពប្រដាល់របស់គេបច្ចុប្បន្ន។
យោងតាមទំព័រហ្វេសប៊ុកផ្លូវការរបស់អភិបាលខេត្តកំពង់ស្ពឺ លោក វ៉ី សំណាង បានគូសបញ្ជាក់ថា ការប្រគល់ម៉ូតូមួយគ្រឿងដល់កីឡាករ ព្រំ សំណាងពេលនេះ គឺដើម្បីឆ្លើយតបជាមួយនឹងការខិតខំប្រឹងប្រែងរបស់កីឡាករ ព្រំ សំណាង ដែលបានតស៊ូតនាំយកជ័យជម្នះដល់កម្ពុជាក្នុងឆាកអន្តរជាតិកន្លងមក។
លោក វ៉ី សំណាង បានថ្លែងថា "ដើម្បីឆ្លើយតបជាមួយនឹងការខិតខំប្រឹងប្រែងរបស់កីឡាករ ព្រំ សំណាង ថ្ងៃនេះខ្ញុំសូមលើកទឹកចិត្ត ដោយប្រគល់ម៉ូតូមួយគ្រឿង សម្រាប់ជាមធ្យោបាយធ្វើដំណើរក្នុងការហ្វឹកហាត់ ដើម្បីក្លាយជាកីឡាករអាជីព sea games នៅពេលដែលប្រទេសយើងនឹងធ្វើជាម្ចាស់ផ្ទះស៊ីហ្គេមនាពេលខាងមុខ។ សូមជូនពរកីឡាករកីឡាការិនីរបស់កម្ពុជា ជាពិសេសកីឡាករ ព្រំ សំណាងសូមទទួលបានជោគជ័យគ្រប់សង្វៀនប្រកួតទាំងអស់។"
គួរបញ្ជាក់ថា កីឡាករគុនខ្មែរ ព្រំ សំណាង នៅតែបន្តសាងនូវប្រវត្តិសាស្រ្តដ៏អស្ចារ្យរបស់ខ្លួននៅលើសង្វៀន Thai Fighi ដោយការវាយជាមួយដៃគូររបស់គេយ៉ាងមានទំនុកចិត្ត ដោយរូបគេបានព្យាយាមវាយរហូតដណ្ដើមបានជ័យជំនះ ដោយបានផ្ដួលជើងខ្លាំង រុស្សី ឲ្យបោះបង់នូវការប្រគួតនៅក្នុងទឹកទី១។នេះជាការប្រគួតលើកទី២ របស់គេដែលបានវាយនៅលើសង្វៀន Thai Fighi ប្រទេសថៃ៕
