ចិនផ្តល់ជំនួយលើការស្តារ និងលើកកម្រិតផ្លូវជាតិលេខ៧ ពីក្រចេះ ទៅស្ទឹងត្រែង

ភ្នំពេញ៖ ក្រសួងសាធារណការ នៅថ្ងៃទី១៤កុម្ភៈ បានបើកកិច្ចប្រជុំពិនិត្យលើគម្រោងស្តារ និងលើកកម្រិតផ្លូវជាតិលេខ៧ ពីខេត្តក្រចេះ ទៅខេត្តស្ទឹងត្រែង រហូតដល់ច្រកទ្វារអន្តរជាតិត្រពាំងគ្រៀល (ព្រំប្រទល់កម្ពុជា-ឡាវ) ជាមួយតំណាងភាគីក្រុមហ៊ុនចិន ដឹកនាំដោយលោក Li Xiangming តំណាងក្រុមហ៊ុន China Railway First Survey & Design Institute Group Co.,Ltd។

ឯកឧត្តម លឹម ស៊ីដេនីន រដ្ឋលេខាធិការក្រសួងសាធារណការ  បានដឹកនាំកិច្ចប្រជុំពិភាក្សាអំពីនីតិវិធី នៃការអនុវត្តគម្រោងស្តារ និងលើកកម្រិតផ្លូវជាតិលេខ៧ ពីភូមិរមាត ឃុំអូរគ្រៀង ស្រុកសំបូរ ខេត្តក្រចេះ រហូតដល់ត្រពាំងគ្រៀល ខេត្តស្ទឹងត្រែង (ព្រំប្រទល់កម្ពុជា-ឡាវ) ជាមួយតំណាងភាគីក្រុមហ៊ុនចិន ព្រមទាំងមានការចូលរួមពីថ្នាក់ដឹកនាំក្រសួង មន្រ្តីបច្ចេកទេស និងមន្រ្តីស្ថានទូតចិនផងដែរ។

ក្រសួងបានបន្តថា កិច្ចប្រជុំនេះរៀបចំឡើងពិភាក្សាអំពីនីតិវិធី នៃការអនុវត្តគម្រោងស្តារ និងលើកកម្រិតផ្លូវជាតិលេខ៧ គិតចាប់ពីភូមិរមាត ឃុំអូរគ្រៀង ស្រុកសំបូរ ខេត្តក្រចេះ រហូតដល់ច្រកទ្វារអន្តរជាតិត្រពាំងគ្រៀល ខេត្តស្ទឹងត្រែង (ព្រំប្រទល់កម្ពុជា-ឡាវ) ដែលមានប្រវែងសរុប ៩៦.៦៣គីឡូម៉ែត្រ ក្រោមជំនួយឥតសំណងពីប្រទេសចិន៕