ភ្នំពេញ៖ សហភាពសហព័ន្ធយុវជនកម្ពុជា (ស.ស.យ.ក.) ផ្ដល់អាហារូបករណ៍១០០% សម្រាប់ថ្នាក់បរិញ្ញាបត្រ និងបរិញ្ញាបត្ររង ចំនួន ៥០កន្លែង ដល់សិស្សានុសិស្ស សម្រាប់សិក្សានៅវិទ្យាស្ថានអភិវឌ្ឍន៍អាស៊ីសច្ចៈ។ អាហារូបករណ៍ ផ្ដល់ឱ្យលើការសិក្សាជំនាញ ទីផ្សារ គណនយ្យ គ្រប់គ្រងពាណិជ្ជកម្ម ភាសាអង់គ្លេស និង វិទ្យាសាស្ត្រកុំព្យូទ័រ។ ចំណែកឯ កាលបរិច្ឆេទផុតកំណត់ទទួលពាក្យអាហារូបករណ៍ នៅថ្ងៃទី០៥ កុម្ភៈ ខាងមុខនេះ។
១ លក្ខខណ្ឌនៃការជ្រើសរើស
-បេក្ខជនដែលមានជីវភាពខ្វះខាត
-បេក្ខជនត្រូវមានសញ្ញាបត្រមធ្យមសិក្សាទុតិយភូមិ (Bac II) ឬឯកសារបញ្ជាក់ដែលមានតម្លៃស្មើ សម្រាប់ការសិក្សាថ្នាក់បរិញ្ញាបត
-បេក្ខជនត្រូវមានលិខិតបញ្ជាក់ធ្លាក់ ឬសញ្ញាបត្រមធ្យមសិក្សាទុតិយភូមិ (Bac II) ឬឯកសារបញ្ជាក់ ដែលមានតម្លៃស្មើ សម្រាប់ការសិក្សាថ្នាក់បរិញ្ញាបត្ររង
-បេក្ខជនត្រូវឆ្លងកាត់ការប្រកួតប្រជែងជ្រើសរើស ដែលរៀបចំដោយក្រុមការងារកម្មវិធីសាបព្រោះគ្រាប់ពូជ នៃសហភាពសហព័ន្ធយុវជនកម្ពុជា រាជធានីភ្នំពេញ។
២ កាលបរិច្ឆេទនៃការទទួលពាក្យ
-បេក្ខជនត្រូវស្នើសុំ និងបំពេញទម្រង់បែបបទស្នើសុំអាហារូបករណ៍ ចាប់ពីថ្ងៃជូនដំណឹងនេះរហូតដល់ ថ្ងៃទី០៥ ខែកុម្ភៈ ឆ្នាំ២០២៣ វេលាម៉ោង៥:៣០នាទីល្ងាច ជាកំហិត។
៣ សំណុំលិខិតដែលត្រូវភ្ជាប់សុំអាហារូបករណ៍របស់ ស.ស.យ.ក. រាជធានីភ្នំពេញ
-ពាក្យសុំអាហារូបករណ៍ ចំនួន ០១ ច្បាប់
-បង្កាន់ដៃទទួលពាក្យស្នើសុំអាហារូបករណ៍ ចំនួន ០១ ច្បាប់
-ជីវប្រវត្តិសង្ខេបដែលមានបិតរូបថតថ្មី (៤x៦) ចំនួន ០១ ច្បាប់
-បេក្ខជនត្រូវមានសញ្ញាបត្រមធ្យមសិក្សាទុតិយភូមិ (Bac II) ឬឯកសារបញ្ជាក់ដែលមានតម្លៃស្មើ ចំនួន ០១ ច្បាប់
-លិខិតបញ្ជាក់ធ្លាក់មធ្យមសិក្សាទុតិយភូមិ (Bac II) ឬឯកសារបញ្ជាក់ ដែលមានតម្លៃស្មើ ចំនួន ០១ ច្បាប់
-ថតចម្លងអត្តសញ្ញាណប័ណ្ណសញ្ជាតិខ្មែរ ឬសេចក្តីចម្លងសំបុត្រកំណើត/សំបុត្របញ្ជាក់កំណើត ចំនួន ០១ ច្បាប់
-រូបថតក្នុងពេលថ្មីៗទំហំ (៤x៦ ស.ម) ថតពីមុខ គ្មានវ៉ែនតា និងមានផ្ទៃខាងក្រោយពណ៌ស ចំនួន ០៣ សន្លឹក។
បេក្ខជនដែលមានចំណាប់អារម្មណ៍ សូមទំនាក់ទំនងតាមទូរស័ព្ទលេខ៖ ០១៦ ៨៣១ ៣៩៧ (Telegram)៕
