យុវជនងាយរងគ្រោះអាចផ្លាស់ប្ដូរផ្នត់គំនិតចំពោះខ្លួនឯងតាមរយៈកម្មវិធី«WE Light Up Talk»

ភ្នំពេញ៖ ក្រុមយុវទូតនៃគម្រោងសហគ្រិននារីសកម្ម កាលពីថ្ងៃទី២៨ មករា បានរៀបចំវេទិកាចែករំលែកបទពិសោធន៍ចម្រុះ WE Light Up Talk ក្នុងគោលបំណងផ្តល់ឱកាសដល់យុវជនមកពីសហគមន៍ចម្រុះ អាចចែករំលែកបទពិសោធន៍ផ្ទាល់ខ្លួនអំពីភាពជាអ្នកដឹកនាំ និងការចូលរួមរបស់យុវជន ដើម្បីបំផុសគំនិតអ្នកចូលរួមទទួលបានការលើកទឹកចិត្ត ឱ្យពួកគេរកឃើញភាពជាខ្លួនឯង ថែមទាំងអាចផ្លាស់ប្ដូរបាននូវផ្នត់គំនិតក្រោមភាពជាអ្នកដឹកនាំរបស់ពួកគេ ដើម្បីរស់នៅក្នុងជីវិតដែលពួកគេជ្រើសរើស។

ថ្លែងក្នុងវេទិកា WE Light Up Talk លោកស្រី ប៉េង ឡូឌី អនុប្រធានគម្រោងសហគ្រិននារីសកម្ម នៃអង្គការផេកកម្ពុជា បានមានប្រសាសន៍ថា ប្រសិនបើស្ត្រី និងយុវជនមកពីសហគមន៍ចម្រុះ ជាពិសេសក្រុមដែលងាយរងគ្រោះ ពួកគេមានឱកាសចូលរួមកម្មវិធីនិយាយជាសាធារណៈ ដែលមានវាគ្មិនមកពីសហគមន៍ចម្រុះឡើងមកចែករំលែកបទពិសោធន៍ដែលពួកគាត់បានឆ្លងកាត់ នោះក្រុមយុវជនទាំងនោះ ពួកគេនឹងអាចចាប់ផ្តើមទទួលយកការពិតជាខ្លួនឯង ហ៊ានប្រឈមមុខនឹងឧបសគ្គដែលពួកគេបានជួបប្រទះ បើកចំហរក្នុងការចែករំលែកបទពិសោធន៍ ព្រមទាំងផ្លាស់ប្តូរការគិតទៅជារឿងវិជ្ជមាន។

លោកស្រី ប៉េង ឡូឌី បានបន្ដថា ពួកគេក៏នឹងអាចផ្លាស់ប្តូរជីវិតរបស់ពួកគេ តាមរយៈការរៀនសូត្របន្ថែមពីយុវជនដទៃ ការបង្កើតបណ្តាញទំនាក់ទំនង និងចាប់ផ្តើមសកម្មក្នុងការចូលរួមសកម្មភាពសង្គម ដើម្បីរួមចំណែកដល់ការអភិវឌ្ឍន៍សង្គមជាតិយើងឱ្យកាន់តែល្អប្រសើរ។

គួរបញ្ជាក់ថា កម្មវិធី WE Light Up Talk ដែលបានប្រព្រឹត្តទៅកាលពីថ្ងៃទី២៨ មករា មានវត្តមានរបស់វាគ្មិនកិត្តិយសចំនួន ០៤រូប ដែលជាអ្នកតំណាងសហគមន៍ជនជាតិដើមភាគតិច អ្នកស្រលាញ់ភេទដូចគ្នា ជនមានពិការភាព និងយុវជនទូទៅ និងមានសាធារណជនចូលរួមរហូតដល់ ៤៩០នាក់៕