ភ្នំពេញ៖ ក្រសួងអប់រំ កាលពីថ្ងៃទី១៣ មករា បានប្រកាសឱ្យអ្នកប្រឡងបាក់ឌុប២០១៩ទៅយកសញ្ញាបត្រផ្លូវការ និងប្រកាសឱ្យអ្នកប្រឡងបាក់ឌុប២០២២ទៅយកសញ្ញាបត្របណ្ដោះអាសន្ន ចាប់ពីថ្ងៃទី២៣ មករា ខាងមុខតទៅ នៅនាយកដ្ឋានកិច្ចការប្រឡងតាមមន្ទីររាជធានី និងខេត្ត។
ក្រសួងអប់រំ បានផលិតសញ្ញាបត្រមធ្យមសិក្សាទុតិយភូមិ សម័យប្រឡង ១៩ សីហា ២០១៩ រួចរាល់ ព្រមទាំងបាន និងកំពុងផលិតវិញ្ញាបនបត្របណ្តោះអាសន្នមធ្យមសិក្សាទុតិយភូមិ សម័យប្រឡង ០៥ ធ្នូ ២០២២ ដើម្បីផ្ដល់ជូន បេក្ខជនដែលបានប្រឡងជាប់ដោយឥតគិតថ្លៃ និងដើម្បីយកទៅប្រើប្រាស់តាមច្បាប់អនុញ្ញាត។
តាមការប្រកាសនេះ សូម លោក លោកស្រី ប្រធានជ្រាប និងចាត់តំណាងដោយភ្ជាប់មក ជាមួយនូវលិខិតឧទ្ទេសនាមប្រើប្រាស់ថវិកាអង្គភាពមន្ទីរសាមី ឱ្យមកទទួលយកសញ្ញាបត្រមធ្យមសិក្សាទុតិយភូមិ និងវិញ្ញាបនបត្រ បណ្តោះអាសន្នមធ្យមសិក្សាទុតិយភូមិ ចាប់ពីថ្ងៃទី២៣ មករា ឆ្នាំ២០២៣ តទៅ នៅនាយកដ្ឋានកិច្ចការប្រឡង។
ប្រធានមន្ទីរត្រូវប្រជុំថ្នាក់ដឹកនាំ មន្ត្រីជំនាញរបស់មន្ទីរ និងនាយក នាយិកាគ្រឹះស្ថានមធ្យមសិក្សាដែលមានបេក្ខជនប្រឡងជាប់ ដើម្បីរៀបចំយន្តការ និងនីតិវិធីផ្ដល់សញ្ញាបត្រ និងវិញ្ញាបនបត្រ និងធ្វើសេចក្តីជូនដំណឹងលម្អិតបន្ថែម ប្រកបដោយស្មារតីទទួលខុសត្រូវខ្ពស់៕
