ព្យុងយ៉ាង៖ មេដឹកនាំប្រទេសកូរ៉េខាងជើងបានបណ្តេញលោក Pak Jong Chon ដែលជាមន្ត្រីយោធាដ៏មានឥទ្ធិពលបំផុតទីពីរបន្ទាប់ពីមេដឹកនាំកូរ៉េខាងជើងលោក គឹម ជុងអ៊ុន ។ការបណ្តេញចេញនេះធ្វើឡើងក្រោយមេដឹកនាំរូបនេះបានប្រកាសអំពាវនាវឲ្យមន្ត្រីកូរ៉េខាងជើងពង្រឹងសមត្ថភាពបន្ថែមក្នុងការបង្កើតរោងចក្រថាមពលនុយក្លេអ៊ែររបស់ខ្លួនបន្ថែមទៀត ដើម្បីប្រឆាំងនិងសហរដ្ឋអាម៉េរិក និងកូរ៉េខាងត្បូង។ នេះបើយោងតាមប្រព័ន្ធផ្សព្វផ្សាយរបស់កូរ៉េខាងជលងបានចុះផ្សាយ។
យោងតាមទីភ្នាក់ងារសារព័ត៌មាន KCNA បានគូសបញ្ជាក់ថា លោក Pak អនុប្រធានគណៈកម្មាធិការយោធាមជ្ឈិមនៃគណបក្សពលករដែលកំពុងកាន់អំណាច និងជាលេខានៃគណៈកម្មាធិការមជ្ឈិមបក្សត្រូវបានជំនួសដោយ Ri Yong Gil នៅក្នុងកិច្ចប្រជុំប្រចាំឆ្នាំរបស់គណៈកម្មាធិការកាលពីសប្តាហ៍មុន។ដោយក្នុងនោះគ្មានហេតុផលសម្រាប់ការផ្លាស់ប្តូរត្រូវបានផ្តល់ឱ្យទេ។ ក្រុងព្យុងយ៉ាងធ្វើការកែលម្អការដឹកនាំរបស់ខ្លួនជាប្រចាំ ហើយការជួបជុំជប់លៀងចុងឆ្នាំត្រូវបានប្រើជាញឹកញាប់ដើម្បីប្រកាសពីការផ្លាស់ប្តូរតំណែងនៃសមាជិកបក្ស និងការសម្រេចចិត្តគោលនយោបាយធំៗរបស់មេដឹកនាំកូរ៉េខាងជើង។
គណៈកម្មាការយោធាកណ្តាលរបស់បក្ស ដែលដឹកនាំដោយលោក គីម ត្រូវបានគេចាត់ទុកថា ជាស្ថាប័នធ្វើការសម្រេចចិត្តផ្នែកយោធាដ៏មានឥទ្ធិពលបំផុតរបស់ប្រទេសនេះ លើសពីក្រសួងការពារជាតិ។ ការជំនួសតំណែងថ្មីរបស់លោក Pak បានកើតឡើងនៅពេលដែលលោក Kim បានអំពាវនាវឱ្យមានការអភិវឌ្ឍមីស៊ីលផ្លោងអន្តរទ្វីបថ្មី និងឃ្លាំងអាវុធនុយក្លេអ៊ែរធំជាងនេះ ដើម្បីប្រឆាំងនឹងសហរដ្ឋអាម៉េរិក និងកូរ៉េខាងត្បូង ដែលជាគន្លឹះនៃយុទ្ធសាស្ត្រការពារប្រទេសរបស់ខ្លួននា ២០២៣ ។
លោក Pak បានផ្លាស់ប្តូរយ៉ាងឆាប់រហ័សនូវតំណែងយោធាពីមេបញ្ជាការកាំភ្លើងធំផ្កាយមួយក្នុងឆ្នាំ ២០១៥ ទៅជាឧត្តមសេនីយ៍ផ្កាយបួនក្នុងឆ្នាំ ២០២០ ដោយទទួលយកកិត្តិយសសម្រាប់ការរួមចំណែកដល់វឌ្ឍនភាពក្នុងបច្ចេកវិទ្យាមីស៊ីលរយៈចម្ងាយខ្លីរបស់ប្រទេស។
នៅចុងឆ្នាំ ២០២០ លោក Pak ត្រូវបានដំឡើងឋានៈជាការិយាល័យនយោបាយ និងទទួលបានងារជាសេនាប្រមុខ ដែលជាឋានៈយោធាខ្ពស់បំផុតក្រោមការដឹកនាំរបស់លោក Kim ហើយបានក្លាយជាសំឡេងនាំមុខគេកាលពីខែវិច្ឆិកាឆ្នាំមុនប្រឆាំងនឹងសមយុទ្ធយោធារួមគ្នារវាងកូរ៉េខាងត្បូង និងសហរដ្ឋអាម៉េរិក។
ការបណ្តេញលោក Pak កើតឡើង បើទោះបីជាលោក Kim ភាគច្រើនបានសរសើរចំពោះភាពជឿនលឿនរបស់យោធាក្នុងការអភិវឌ្ឍន៍អាវុធក្នុងអំឡុងពេលកិច្ចប្រជុំក៏ដោយ៕
