ភ្នំពេញ៖ អង្គការភ្លែនអន្តរជាតិកម្ពុជា នៅថ្ងៃទី២១ ធ្នូ បានប្រកាសជាផ្លូវការទូតសុឆន្ទៈរបស់យុទ្ធនាការក្មេងស្រីត្រូវមានឱកាសស្មើគ្នា។ យុវជនបីនាក់ ដែលបានជ្រើសរើសជាទូតសុឆន្ទៈ មកពីតំបន់ប្រតិបត្តិការរបស់អង្គការភ្លែនអន្តរជាតិកម្ពុជា មានខេត្តសៀមរាប រតនគិរី និងស្ទឹងត្រែង ។ យុទ្ធនាការក្មេងស្រីត្រូវមានឱកាសស្មើគ្នា មានគោលបំណងធានាថា ក្មេងស្រី និងស្ត្រីវ័យក្មេង មានអំណាចលើជីវិតផ្ទាល់ខ្លួន ការសម្រេចចិត្ត និងអាចរៀបចំពិភពលោកជុំវិញខ្លួនពួកគេ។
លោក យី គីមថាន នាយករងប្រចាំប្រទេសនៃអង្គការភ្លែនអន្តរជាតិកម្ពុជា បានឱ្យដឹងថាទូតសុឆន្ទៈ យុទ្ធនាការក្មេងស្រីត្រូវមានឱកាសស្មើគ្នា ជាយុវជនសកម្មនៅក្នុងសហគមន៍របស់ពួកគេ និងបានឆ្លងកាត់ដំណើរការជ្រើសរើសតាំងពីខែកក្កដា នៅឆ្នាំនេះ។ ក្នុងអំឡុងពេលនៃការជ្រើសរើស ពួកគេបីនាក់បានបង្ហាញពីការប្តេជ្ញាចិត្ត និងភាពជាអ្នកដឹកនាំដ៏ល្អរបស់ពួកគេនៅក្នុងការងារសហគមន៍ដែលពួកគេបានធ្វើដើម្បីលើកកម្ពស់សមភាពសម្រាប់ក្មេងស្រី និងស្ត្រី។
កញ្ញា ពៅ ស្រីណូ ទូតសុឆន្ទៈយុទ្ធនាការក្មេងស្រីត្រូវមានឱកាសស្មើគ្នា មកពីខេត្តសៀមរាប បានពន្យល់ថា វាជាមហិច្ឆតារបស់នាងតាំងពីតូចមកម្ល៉េះ ជាពិសេសនាងចង់បំបែករបាំងនៃវិសមភាពយេនឌ័រ និងឧបសគ្គដែលរារាំងក្មេងស្រីមិនឱ្យធ្វើសេចក្តីសម្រេចចិត្ត។ ស្រីណូបាននិយាយថា៖ «យើង នឹងមិនឈប់ទេ លុះណាតែស្រ្តី និងក្មេងស្រីទទួលបានសិទ្ធិពេញលេញ»។
កញ្ញា ពៅ ស្រីណូ កញ្ញា លេខ ការី និង លោក ហេន សុភាព ជាយុវជនមកពីខេត្តសៀមរាប រតនគិរី និងស្ទឹងត្រែង។ យុវជនទាំងបីរូបនេះ បានចូលរួមយ៉ាងសកម្មនៅក្នុងសហគមន៍ ដែលធ្វើឱ្យសហគមន៍របស់ពួកគេក្លាយជាកន្លែងប្រសើរ។ ក្នុងរយៈពេលមួយឆ្នាំ ទូតសុឆន្ទៈយុទ្ធនាការក្មេងស្រីត្រូវមានឱកាសស្មើគ្នា នឹងចូលរួមនៅក្នុងសកម្មភាពនានាទាំងផ្ទាល់ និងអនឡាញ ដើម្បីសិទ្ធិកុមារី និងសមភាពយេនឌ័រ។ ពួកគេក្លាយជាគំរូ និងភ្នាក់ងារនៃការផ្លាស់ប្តូរនាពេលបច្ចុប្បន្ន និងអនាគត៕
.png?1685936352)
