ចិនផ្ដល់អាហារូបករណ៍៦៧កន្លែង សម្រាប់ថ្នាក់បរិញ្ញាបត្រជាន់ខ្ពស់និងថា្នក់បរិញ្ញាបត្រ

ភ្នំពេញ៖ ក្រសួងអប់រំ នៅក្នុងឆ្នាំ២០២៣ នឹងធ្វើការប្រឡងជ្រើសរើសនិស្សិតចំនួន ៦៧នាក់ ឱ្យទទួលអាហារូបករណ៍របស់រដ្ឋាភិបាល នៃសាធារណរដ្ឋប្រជាមានិតចិន (CSC) ដើម្បីទៅបន្តការសិក្សាថ្នាក់បរិញ្ញាបត្រជាន់ខ្ពស់ និងថ្នាក់បរិញ្ញាបត្រ នៅតាមគ្រឹះស្ថាន ឧត្តមសិក្សានានា ក្នុងប្រទេសចិន សម្រាប់ឆ្នាំសិក្សា២០២៣-២០២៤។ ពាក្យសុំប្រឡង នឹងទទួលរហូតដល់ថ្ងៃទី០៩ ខែមករា ឆ្នាំ២០២៣ វេលាម៉ោង ០៤រសៀល នៅការិយាល័យអាហារូបករណ៍ និងកម្មសិក្សា នៃនាយកដ្ឋានទំនាក់ទំនងវប្បធម៌ និងអាហារូបករណ៍។

ចំណែកឯសោហ៊ុយធ្វើដំណើរទៅមក កម្ពុជា-ចិន-កម្ពុជា ជាបន្ទុករបស់សាមីជន ឯការចំណាយផ្សេងៗ ដូចជា ការស្នាក់នៅ ការសិក្សា និងប្រាក់អាហារូបករណ៍ ជាបន្ទុករបស់រដ្ឋាភិបាលចិន។ មុខជំនាញសិក្សា មាន វិទ្យាសាស្ត្រ វិស្វកម្ម សេដ្ឋកិច្ច ការគ្រប់គ្រងពាណិជ្ជកម្ម វេជ្ជសាស្ត្រ ព័ត៌មានវិទ្យា ។

លក្ខខណ្ឌនៃការចុះឈ្មោះជាបេក្ខជន៖

ក-ថ្នាក់បរិញ្ញាបត្រជាន់ខ្ពស់

បេក្ខជនទាំងពីរភេទត្រូវមានសញ្ជាតិខ្មែរ, សញ្ញាបត្របរិញ្ញាបត្រ (Bachelor), អាយុយ៉ាងច្រើន ៣៥ឆ្នាំ, ចំណេះដឹងភាសាអង់គ្លេសជ្រៅជ្រះ និងមានសុខភាពល្អបរិបូណ៌ទាំងកាយសម្បទា និងសតិបញ្ញា។

ខ-ថ្នាក់បរិញ្ញាបត្រ

បេក្ខជនទាំងពីរភេទត្រូវមានសញ្ជាតិខ្មែរ, មានសញ្ញាបត្រមធ្យមសិក្សាទុតិយភូមិ ឬសញ្ញាបត្រមានតម្លៃស្មើ, មានអាយុក្រោម ២៥ ឆ្នាំ, មានលិខិតបញ្ជាក់ពីកម្រិតចំណេះដឹងភាសាចិន HSK3, មានសុខភាពល្អបរិបូណ៌ទាំងកាយសម្បទា និងសតិបញ្ញា។

គួរបញ្ជាក់ថា កាលបរិច្ឆេទ នៃការប្រឡងថ្ងៃទី១៥ ខែមករា ឆ្នាំ២០២៣។ ចំណែកឯមណ្ឌលប្រឡង នឹងជម្រាបជូននៅពេលក្រោយ៕