ភ្នំពេញ៖ ថ្ងៃទី២ នៃការប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) នាព្រឹកថ្ងៃទី០៦ វិច្ឆិកា នេះ មានបេក្ខជនអវត្តមាននៅក្នុងការប្រឡង ចំនួន២ ៣៥៨នាក់ ក្នុងនោះមានស្រី១ ០២៨នាក់។ បើប្រៀបធៀបកាលពីព្រឹកថ្ងៃទី០៥ វិច្ឆិកា មានបេក្ខជនអវត្តមានត្រឹមតែ ២ ២៦៤នាក់ ដែលមានស្រីចំនួន ១ ០០៤នាក់ ប៉ុណ្ណោះ។
នៅព្រឹកថ្ងៃទី២នៃការប្រឡងនេះ មានបេក្ខជនអវត្តមានចំនួន២ ៣៥៨នាក់ ក្នុងនោះមានស្រី១ ០២៨នាក់ មានបញ្ហាសុខភាព ២៦នាក់ ដែលក្នុងនោះមានបេក្ខជនចំនួន ០៤នាក់ សង្ស័យវិជ្ជមានជំងឺកូវីដ-១៩ ។ ហើយគណៈកម្មការមានបញ្ហាសុខភាព មានបញ្ហាសុខភាពចំនួន ១៣ករណី។ បើប្រៀបធៀបការប្រឡងនៅព្រឹកថ្ងៃទី១ មានបេក្ខជនអវត្តមាននៅក្នុងការប្រឡងបាក់ឌុបនេះ មានត្រឹមតែ ២២៦៤នាក់ ដែលមានស្រីចំនួន ១០០៤នាក់ ដែលមានការកើនឡើងបេក្ខជនអវត្តមានចំនួន ៩៤នាក់។
ការបូកសរុបដំណើរការសំណេរនាព្រឹកថ្ងៃទី២ នៃការប្រឡងសញ្ញាបត្រមធ្យមសិក្សាទុតិយភូមិ មានពីរមុខវិជ្ជាគឺអក្សរសាស្ត្រខ្មែរ និងរូបវិទ្យា សម្រាប់ថ្នាក់វិទ្យាសាស្ត្រ គណិតវិទ្យា និងសីលធម៌ ពលរដ្ឋវិជ្ជា សម្រាប់ថ្នាក់វិទ្យាសាស្ត្រសង្គម បានប្រព្រឹត្តទៅដោយរលូនល្អ មិនមានបាតុភាពមិនប្រក្រតីណាមួយកើតឡើងគួរឲ្យកត់សម្គាល់ឡើយ។
គួរបញ្ជាក់ថា ការប្រឡងបាក់ឌុបឆ្នាំនេះ មានបេក្ខជនសរុបចំនួន១២៨ ១៣៥នាក់ ស្រី៦៨ ៧៧១នាក់ មាន២២១មណ្ឌល ដែលត្រូវជា៥ ១៧៤បន្ទប់ និងមានការចូលរួមដោយគណៈមេប្រយោគ និងគណៈកម្មការនានា ចូលរួមក្នុងដំណើរនោះប្រឡងសរុបចំនួន១៧ ២៤០ នាក់ជំនួយការអប្បមាទដែលជាគរុសិស្ស និងគរុនិស្សិត ចំនួន២ ៧៥៦នាក់។ អង្គភាពប្រឆាំងអំពើពុករលួយ បានឯកភាពចូលរួមសង្កេតការណ៍ ដោយបានចាត់ថ្នាក់ដឹកនាំ និងមន្រ្តីចំនួន៣៥០នាក់ និងអ្នកសង្កេតការណ៍រាជធានី ខេត្តចំនួន២ ៧០០នាក់៕
