កូរ៉េខាងជើងបាញ់«កាំភ្លើងធំជាង១០០ដើម»ក្នុងសមយុទ្ធយោធា

ព្យុងយ៉ាង៖ កូរ៉េខាងជើងបានបាញ់ផ្លោងកាំភ្លើងធំប្រហែល ១៣០ គ្រាប់ចូលទៅក្នុងសមុទ្រ ពីឆ្នេរសមុទ្រភាគខាងកើត និងខាងលិចរបស់ខ្លួននាថ្ងៃចន្ទនេះ នៅក្នុងសមយុទ្ធយោធាជាក់ស្តែងចុងក្រោយបង្អស់នៅជិតព្រំដែនរួមគ្នារបស់ពួកគេ។ ការបាញ់នេះធ្វើឡើងចំពេលស្ថានភាពនៅឧបទ្វីបកូរ៉េកាន់តែក្តៅ។

បើតាមមន្រ្តីកូរ៉េបានឲ្យដឹងថាគ្រាប់ផ្លោងមួយចំនួនបានធ្លាក់នៅតំបន់ការពារក្បែរព្រំដែនសមុទ្រ ខណៈដែលទីក្រុងសេអ៊ូលបាននិយាយថា ជាការរំលោភលើកិច្ចព្រមព្រៀងអន្តរកូរ៉េឆ្នាំ ២០១៨ ដែលត្រូវបានរចនាឡើងដើម្បីកាត់បន្ថយភាពតានតឹងរវាងកូរ៉េទាំងពីរ។ ក្រសួងការពារជាតិកូរ៉េខាងត្បូងបាននិយាយនៅក្នុងសេចក្តីថ្លែងការណ៍មួយថា យោធាកូរ៉េខាងត្បូងបានបញ្ជូនទំនាក់ទំនងព្រមានជាច្រើនទៅកាន់កូរ៉េខាងជើងជុំវិញការបាញ់នេះ។

ដោយឡែកកូរ៉េខាងជើងមិនបានរាយការណ៍ភ្លាមៗអំពីការបាញ់កាំភ្លើងធំនោះទេ ប៉ុន្តែខ្លួនបាននិងកំពុងអនុវត្តសកម្មភាពយោធាកាន់តែច្រើនឡើង រួមទាំងការបាញ់មីស៊ីល និងសមយុទ្ធដោយយន្តហោះចម្បាំង និងអង្គភាពកាំភ្លើងធំ។

កូរ៉េខាងត្បូង និងសហរដ្ឋអាម៉េរិកក៏បានបង្កើនសមយុទ្ធយោធានៅឆ្នាំនេះផងដែរ ដោយនិយាយថា ពួកគេចាំបាច់ដើម្បីរារាំងកូរ៉េខាងជើងដែលមានអាវុធនុយក្លេអ៊ែរ។ កិច្ចព្រមព្រៀងយោធាគ្រប់ជ្រុងជ្រោយឆ្នាំ ២០១៨ (CMA) គឺជាកិច្ចព្រមព្រៀងដ៏សំខាន់បំផុតដែលកើតចេញពីកិច្ចប្រជុំជាច្រើនខែរវាងមេដឹកនាំគីម ជុងអ៊ុន និងប្រធានាធិបតីកូរ៉េខាងត្បូងនាពេលនោះ លោក មូន ជេអ៊ីន៕