![](https://cdn.cc-times.com/kh.cc-times.com/media/26856/large/photo_2022-11-24_13-46-13_(2).jpg?1669876551)
ភ្នំពេញ៖ តាមរយះអង្គការទិន្នន័យអំពីការភិវឌ្ឍ (ODC) កញ្ញា រចំ មុន្នី តំណាងស្ដ្រីសហគមន៍ជនជាតិដើមភាគតិច បានចូលរួមវេទិកាសន្ដិភាពទីក្រុងប៉ារីសឆ្នាំ២០២២ លើកទី៥ នៅPalais Brongniart ទីក្រុងប៉ារីស ប្រទេសបារាំង ដើម្បីធ្វើបទបង្ហាញពីគម្រោងរបស់ ODC។ វេទិកានេះ បានប្រព្រឹត្តទៅចាប់ពីថ្ងៃទី១១-១២ វិច្ឆិកា។
នៅក្នុងវេទិកានេះ អង្គការទិន្នន័យអំពីការភិវឌ្ឍបានបទបង្ហាញពីគម្រោង «ទិន្នន័យបើកទូលាយសម្រាប់ជនជាតិដើមភាគតិច និងជនជាតិភាគតិច»។ គម្រោងនេះ ត្រូវបានធ្វើបទបង្ហាញដោយយុវជនពីរូប មកពីសហគមន៍ជនជាតិដើមភាគតិច ដែលនិយាយរៀបរាប់អំពីរឿងរ៉ាវទាក់ទងនឹងសហគមន៍របស់ពួកគេ ដើម្បីធ្វើឱ្យសំឡេងរបស់ពួកគេបានឮនៅលើឆាកអន្តរជាតិ។
កញ្ញា រចំ មុន្នី ជនជាតិដើមភាគតិចចារ៉ាយ និងជាអ្នកធ្វើបទបង្ហាញនៅអំពីគម្រោងនេះ បានប្រាប់ស៊ីស៊ីថាមស៍ថា គម្រោងនេះមានសារៈសំខាន់សម្រាប់សហគមន៍ជនជាតិដើមភាគតិច និងជនជាតិភាគតិច ដើម្បីទទួលបានទិន្នន័យ និងព័ត៌មានកាន់តែប្រសើរឡើងសម្រាប់ការអនុវត្តសិទ្ធិរបស់ពួកគេក្នុងការសម្រេចចិត្តដោយខ្លួនឯង និងការគ្រប់គ្រងខ្លួនឯង។
![](https://cdn.cc-times.com/kh.cc-times.com/media/26857/large/photo_2022-11-24_13-46-13.jpg?1669876628)
កញ្ញា រចំ មុន្នី បានបន្ដថា គម្រោងនេះ នឹងជួយផ្សព្វផ្សាយទិន្នន័យរបស់ជនជាតិដើមភាគតិច ក៏ដូចជាសារៈសំខាន់នៃការចងក្រងទិន្នន័យរបស់ជនជាតិដើមភាគតិច ដូចជា អត្តញ្ញាណ វប្បធម៌ ប្រពៃណី សម្លៀកបំពាក់ និងអាហារ ដាក់នៅក្នុងគេហទំព័រ សម្រាប់អ្នកដែលមានបំណងយល់ដឹងពីជនជាតិដើមភាគតិច អាចចូលទៅកាន់គេហទំព័រ នោះ ដើម្បីស្វែងរកព័ត៌មានអំពីជនជាតិដើមភាគតិច។
តាមរយៈគម្រោង «ទិន្នន័យបើកទូលាយសម្រាប់ជនជាតិដើមភាគតិច និងជនជាតិភាគតិច» នឹងរក្សាបាននូវជនជាតិដើមភាគតិចចំនួន ២៤ជនជាតិ រហូតដល់ជំនាន់ក្រោយទៀត ដើម្បីបង្ហាញថាជនជាតិដើមភាគតិច ជាជនជាតិដើមភាគតិច ដែលបាននឹងកំពុងរស់នៅក្នុងប្រទេសកម្ពុជា មានចំនួនច្បាស់លាស់ និងដើមកំណើតពិតប្រាកដ៕
![](https://cdn.cc-times.com/kh.cc-times.com/media/26858/large/photo_2022-11-24_13-46-12_(2).jpg?1669876645)
![](https://cdn.cc-times.com/kh.cc-times.com/media/26859/large/photo_2022-11-24_13-46-12.jpg?1669876653)
![](https://cdn.cc-times.com/kh.cc-times.com/media/26860/large/photo_2022-11-12_18-44-33.jpg?1669876664)
![](https://cdn.cc-times.com/kh.cc-times.com/media/26861/large/photo_2022-11-24_13-46-15_(2).jpg?1669876673)