ចិន៖ ផ្លែឈើដែលនាំចូលពីបណ្តាប្រទេសសមាគមប្រជាជាតិអាស៊ីអាគ្នេយ៍ (អាស៊ាន) ដែលជាដៃគូពាណិជ្ជកម្មដ៏ធំបំផុតរបស់ប្រទេសចិន ទទួលបានប្រជាប្រិយភាពយ៉ាងខ្លាំងនៅក្នុងទីផ្សារប្រទេសចិន ដោយតម្លៃនៃការនាំចូលផ្លែឈើរបស់អាស៊ានបានកើនឡើងរាប់សិបដងក្នុងរយៈពេលប៉ុន្មានឆ្នាំចុងក្រោយនេះ។
ក្រុមហ៊ុនផ្លែឈើ Taihe នៅទីក្រុងប៉េកាំងលក់ផ្លែឈើជាង ៦០ ប្រភេទដែលនាំចូលពីប្រទេសជាង ៣០ ជារៀងរាល់ឆ្នាំ។ Taihe គឺជាក្រុមហ៊ុនដែលនាំចូលផ្លែឈើដ៏ធំបំផុតនៅទីផ្សារលក់ដុំកសិកម្ម Xinfadi ដែលជាទីផ្សារដ៏ធំបំផុតនៃប្រភេទទំនិញនៅក្នុងរដ្ឋធានីរបស់ប្រទេសចិន។ លោក Xue អ្នកគ្រប់គ្រងក្រុមហ៊ុន បាននិយាយថា "ផ្លែឈើពីបណ្តាប្រទេសអាស៊ានមានចំនួនមួយភាគបីនៃការលក់សរុបរបស់យើង។ លោកបន្ថែមថាជាឧទាហរណ៍ យើងលក់បានជាង ៦,០០០ តោនកាលពីឆ្នាំមុន។ យើងថែមទាំងបានចុះកិច្ចសន្យាដាំទុរេននៅក្នុងប្រទេសថៃក្នុងរយៈពេលប្រាំបួនឆ្នាំចុងក្រោយនេះ ដើម្បីបំពេញតម្រូវការកើនឡើង"ថែមទៀតផង ។
ការលក់ផ្លែឈើរបស់ក្រុមហ៊ុន Taihe គឺគ្រាន់តែជាកញ្ចក់តូចមួយដែលឆ្លុះបញ្ចាំងពីការកើនឡើងនៃលំហូរនៃផ្លែឈើរបស់អាស៊ានទៅកាន់ប្រទេសចិន។ យោងតាមស្ថិតិក្នុងឆ្នាំ ២០០៤ ប្រទេសចិនបាននាំចូលផ្លែឈើពីបណ្តាប្រទេសអាស៊ានក្នុងតម្លៃ ៣០០ លានដុល្លារ។ របាយការណ៍របស់រដ្ឋបាលគយចិន បានបង្ហាញថា ការនាំចូលផ្លែឈើស្រស់ និងគ្រាប់របស់ចិនក្នុងឆ្នាំ ២០២១ មានតម្លៃប្រហែល ១៥.២ពាន់លានដុល្លារអាមេរិក ហើយទំនិញមកពីប្រទេសថៃ វៀតណាម ហ្វីលីពីន ម៉ាឡេស៊ី និងកម្ពុជា មានចំនួនជាង ៦០ ភាគរយ។ ក្នុងចំណោមប្រទេសអាស៊ានទាំងដប់ ប្រទេសថៃមានតម្លៃលក់ផ្លែឈើច្រើនជាងគេទៅកាន់ប្រទេសចិន ដោយចំណាត់ថ្នាក់ទុរេន ចេក និងមង្ឃុត ជាផ្លែឈើអាស៊ានពេញនិយមបំផុតក្នុងស្រុក។
ចំណែកលោក លោក Lu Jiao អគ្គនាយកនៃនាយកដ្ឋានភស្តុភារនៃទីផ្សារលក់ដុំកសិកម្ម Xinfadi បាននិយាយ «ក្នុងចំណោមតំបន់សំខាន់ៗដែលចិននាំចូលផ្លែឈើ បណ្តាប្រទេសអាស៊ានមានភូមិសាស្ត្រជិតបំផុត ដូច្នេះវាងាយស្រួលក្នុងការរក្សាផ្លែឈើឱ្យស្រស់ និងតម្លៃដឹកជញ្ជូនទាប។
ជាមួយនឹងភាពជាដៃគូសេដ្ឋកិច្ចទូលំទូលាយក្នុងតំបន់ (RCEP) ចូលជាធរមាននៅដើមឆ្នាំនេះ វាបានជួយសម្រួលបន្ថែមទៀតដល់ពាណិជ្ជកម្មផ្លែឈើ។ បច្ចុប្បន្ននេះ ផ្លែឈើចំនួន ៦៦ ប្រភេទមកពីប្រទេសចំនួន ៩ ក្នុងចំណោមប្រទេសអាស៊ានទាំង ១០ បានទទួលវិញ្ញាបនបត្រសម្រាប់ការនាំចេញទៅកាន់ប្រទេសចិនជាផ្លូវរួចជាស្រេច។
បន្ថែមពីនេះនៅឯពិព័រណ៍ចិន-អាស៊ានលើកទី ១៩ ដែលប្រព្រឹត្តទៅពីថ្ងៃទី ១៦ ដល់ថ្ងៃទី ១៩ ខែកញ្ញានៅទីក្រុងណាននីង នៃតំបន់ស្វយ័តក្វាងស៊ីចូវ ភាគខាងត្បូងប្រទេសចិន ពាណិជ្ជកម្មផ្លែឈើក៏បានដើរតួនាទីយ៉ាងសំខាន់ផងដែរ ដោយមានអ្នកនាំចេញបរទេសជាច្រើនស្វែងរកចំណែកទីផ្សារចិនកាន់តែច្រើន៕
