ភ្នំពេញ៖ ក្រសួងបរិស្ថាន កាលពីពេលថ្មីៗនេះ បានចេញប្រកាសស្តីពី ការទទួលស្គាល់សហគមន៍តំបន់ការពារធម្មជាតិ «អូរដំដែក» ក្នុងតំបន់អភិរក្សសត្វខ្សឹបទួលគ្រើល នៃតំបន់ការពារទេសភាពទំនាបខាងជើងទន្លេសាប ស្ថិតនៅភូមិម្រាក«ក» ឃុំទួលគ្រើល ស្រុកប្រាសាទបល្ល័ង្ក ខេត្តកំពង់ធំ។
ប្រកាសនេះគឺជាការគាំទ្រផ្នែកច្បាប់ដល់សហគមន៍តំបន់ការពារធម្មជាតិ «អូរដំដែក» ក្នុងគោលបំណងលើកកម្ពស់ការចូលរួមរបស់ប្រជាសហគមន៍មូលដ្ឋានដើម្បីគ្រប់គ្រង និងអភិរក្សធនធានធម្មជាតិប្រកបដោយចីរភាព ពិសេសការអភិរក្សប្រភេទសត្វខ្សឹប ដែលជាប្រភេទសត្វជិតផុតពូជបំផុតលើពិភពលោក និងដើម្បីរួមចំណែកលើកកម្ពស់ជីវភាពសហគមន៍មូលដ្ឋាន។
គូរបញ្ជាក់ថា សហគមន៍តំបន់ការពារធម្មជាតិ «អូរដំដែក» មានផ្ទៃដីសរុប ១,១៥០ ហិកតា គ្របដណ្តប់លើភូមិម្រាក«ក» ដែលមានប្រជាជនសរុបចំនួន ១៦២គ្រួសារ។ សហគមន៍នេះបាននិងកំពុងចូលរួមយ៉ាងសកម្មក្នុងសកម្មភាពអភិរក្សសត្វខ្សឹប និងធនធានធម្មជាតិក្នុងតំបន់ តាមរយៈការចូលរួមល្បាត ការស្រាវជ្រាវ អង្កេតតាមដាន និងរាយការណ៍អំពីកត្តាគំរាមកំហែងនានាចំពោះសត្វខ្សឹប និងទីជម្រក ជូនដល់មន្ត្រីជំនាញនៃមន្ទីរបរិស្ថាន ក្រសួងបរិស្ថាន និងក្រុមការងារគម្រោងនៃអង្គការ WCS៕
