Updated៖ យុវជន១៨រូប មកពីក្លឹបដេញដោលមតិ នៃវិទ្យាល័យព្រះស៊ីសុវត្ថិសាលារៀនជំនាប់ថ្មី (NGS Debate Club) បានឈ្នះមេដាយប្រមាណជា ៥១គ្រឿង និងពានចំនួន ០៤ ពីការប្រកួតបញ្ញាវន្តអន្តរជាតិឆ្នាំ២០២២ (The World Scholar's Cup 2022-WSC) វគ្គ Global Round នៅទីក្រុងបាងកក ប្រទេសថៃ។ ការប្រកួតនេះបានធ្វើឡើងកាលពីថ្ងៃទី០២-០៧ កញ្ញា ដោយមានការចូលរួមពីយុវជនមកពីជាង ៥០ប្រទេស។
យុវជន មាស សុបញ្ញា សិស្សនៃសាលារៀនជំនាន់ថ្មីនៃវិទ្យាល័យព្រះស៊ីសុវត្ថិ បានប្រាបើស៊ីស៊ីថាមស៍ថា យុវជន១៨រូប មកពី NGS Debate Club កាលពីថ្ងៃទី០១ កញ្ញា បានទៅចូលរួមការប្រកួតបញ្ញាវន្តអន្តរជាតិឆ្នាំ២០២និងបានត្រឡប់មកកម្ពុជាវិញកាលពីរសៀលថ្ងៃទី០៨ កញ្ញា។ នៅក្នុងការប្រកួតនោះ យុវជនទាំង១៨រូបនោះ បានឈ្នះមេដាយ ៥១គ្រឿង និងពានចំនួន ០៤។។ ក្នុងនោះមានមេដាយមាសចំនួន ២៩គ្រឿង និងមេដាយប្រាក់ចំនួន ២២គ្រឿង។
គួរបញ្ជាក់ថា នៅក្នុងវគ្គប្រចាំតំបន់ ដែលបានប្រព្រឹត្តទៅនៅកម្ពុជា យុវជនមកពី NGS Debate Club ២១រូប បានទៅប្រកួតនៅវគ្គ Global Round។ ប៉ុន្ដែមានយុវជន១៨រូប បានសម្រេចចិត្តទៅចួលរួមប្រកួតវគ្គ Global Round នៅប្រទេសថៃ ខណៈយុវជន៣រូបផ្សេងទៀត នឹងទៅចូលរួមការប្រកួតវគ្គ Global Round នៅប្រទេសវៀតណាម នាថ្ងៃទី១៦ កញ្ញា ខាងមុខនេះ៕
