ភ្នំពេញ៖ អ្នកស្រី ពៅ ណាវីន បានបើកអាជីវកម្មលក់សៀវភៅជាភាសាបរទេស តាំងពីឆ្នាំ២០១៧ តាមរយៈអនឡាញ។ នៅក្នុងឆ្នាំ២០១៨ អ្នកបាននាំចូលសៀវភៅ ស្ទើគ្រប់ប្រភេទទាំងអស់ ប៉ុន្ដែសៀវភៅដែលនាំចូលច្រើនជាងគេ មាន៤ប្រភេទប៉ុណ្ណោះ។ រហូតដល់ឆ្នាំ២០២០ ទើបអ្នកស្រីបានបើកដំណើរការបណ្ណាគារ ដែលមានឈ្មោះថា AZ Book Store និងមានទីតាំងនៅក្នុងបុរីប៉េងហួត បឹងស្នោ។
អ្នកស្រី ណាវីន បានប្រាប់ស៊ីស៊ីថាមស៍ថា អ្នកស្រីបានចាប់ផ្ដើមលក់សៀវភៅដំបូងនៅក្នុងឆ្នាំ២០១៧ ប៉ុន្ដែនៅពេលនោះមិនទាន់មានការនាំចូលសៀវភៅមកច្រើននៅឡើយទេ។ រហូតដល់ឆ្នាំ២០១៨ ទើបមានការនាំចូលសៀវភៅស្ទើតែគ្រប់ប្រភេទសៀវភៅទាំងអស់ ប៉ុន្ដែអ្នកស្រី ផ្ដោតទៅលើសៀវភៅរឿង ភាពជាអ្នកដឹកនាំ ជំនួញ និងសៀវភៅការអភិវឌ្ឍន៍ខ្លួន ច្រើនជាងសៀវភៅផ្សេងៗទៀត ដោយសារសៀវភៅទាំងនោះមានការគាំទ្រច្រើនពីយុវជន។
អ្នកស្រី ណាវីន បានបន្ដថា ដោយព្រោះស្រឡាញ់ការអានសៀវភៅ ទើបអ្នកស្រីចាប់ផ្ដើមការលក់សៀវភៅនេះ ហើយវាក៏ជាមុខរបរដែលអ្នកស្រីស្រឡាញ់។ បន្ថែមពីនេះទៀត AZ Book Store មានលក់សៀវភៅជាភាសាអង់គ្លេសតែប៉ុណ្ណោះ ដោយសារសៀវភៅជាភាសាអង់គ្លេសមានភាពងាយស្រួលក្នុងការនាំចូល។
អ្នកស្រី ណាវីន បានបន្ដទៀតថា នៅពេលចាប់ផ្ដើមលក់សៀវភៅដំបូងតាមរយៈអនឡាញ មានផលពិបាកជាមួយការដឹកជញ្ជូន ដោយសារវាជាការចាប់ផ្ដើមដំបូង ទើបមិនយល់ពីការដឹកជញ្ជូននេះ។ បន្ថែមពីនេះទៀត គឺអតិថិជនមួយចំនួន មានការសុំមិនគិតថ្លៃសេវាដឹកជញ្ជូន និងពិបាកនៅក្នុងការគ្រប់គ្រងឥវាន់នៅពេលមានការកម្មង់ច្រើន។
អ្នកស្រី ណាវីន បានបន្ថែមថា នៅក្នុងឆ្នាំ២០២០ អ្នកស្រីបានបើកដំណើរការបណ្ណាគារ មានឈ្មោះថា AZ Book Store។ ប៉ុន្ដែការបើកដំណើរការនោះបានត្រឹមតែមួយរយៈពេលខ្លីប៉ុណ្ណោះ ក៏មានការបិទទ្វារដោយសារការរីករាលដាលនៃវីរុសកូវីដ-១៩។ ប៉ុន្ដែចំនួននៃការលក់ មិនជាបញ្ហាឡើយ ដោយសារការលក់តាមរយៈអនឡាញមានភាពល្អប្រសើរជាង ការលក់នៅក្នុងបណ្ណគារផ្ទាល់៕
