នាវាដឹកផ្លែឈើចិនទៅថៃខូចទើរមកដែនសមុទ្រកម្ពុជា

ព្រះសីហនុ៖ នាវាដឹកផ្លែឈើចិនទៅថៃនាថ្ងៃទី ១៤ កក្កដានេះបានរសាត់មកបុកថ្មខាងលិចកោះតាងក្នុងខេត្តព្រះសីហនុ ដោយសារតែមានបញ្ហាម៉ាស៊ីនមិនដំណើរការ និងដាច់ខ្សែយុថ្កា ក៏បានរសាត់អណ្តែតចូលមកដែនសមុទ្រប្រទេសកម្ពុជា។នេះបើតាមការបញ្ជាក់ពីមន្រ្តីនៃខេត្តព្រះសីហនុ។

បើតាមមន្រ្តីប្រចាំខេត្តព្រះសីហនុបានអៈអាងថា នាវាឈ្មោះ សេង កង មានបណ្តោយប្រវែង ៥២ម៉ែត ទទឹង៨ម៉ែត ជម្រៅទឹក ៤.៥ម៉ែត មានកម្លាំងម៉ាស៊ីន ៥៤០សេស មានម៉ាស៊ីនរត់២ គ្រឿង និងម៉ាស៊ីនភ្លើង១គ្រឿង បានបើកបរមកពីប្រទេសចិន ឆ្ពោះទៅកាន់ប្រទេសថៃ ដើម្បីដឹកផ្លែឈើទៅកាន់ប្រទេសចិនវិញ មូលហេតុដែលចូលសមុទ្រកម្ពុជាដោយបញ្ហាម៉ាស៊ីនខូច និងដាច់ខ្សែយុថ្កា ក៏បានអណ្តែតចូលក្នុងដែនសមុទ្រកម្ពុជា ។

បញ្ជាការជួរមុខ អគ្គលេខាដ្ឋាន នៃគណៈកម្មាធិការជាតិសន្តិសុខលម្ហសមុទ្រ បានចេញប្រតិបត្តិការរុករកក្រុមនាវិករបស់នាវា សេងកង ដោយបានរកឃើញនាវិកចំនួន៤នាក់លើនាវា។ អ្នកទាំង៤នាក់បានបញ្ជាក់ថា លិខិតឆ្លងដែនរបស់ខ្លួនបានធ្លាក់ចូលក្នុងទឹកបាត់។ ក្រោយពីបានសាកសួរនិងធ្វើកំណត់ហេតុរួច បានបញ្ជូនអោយកម្លាំងប៉ូលីសព្រំដែនទឹក ដឹកនាំដោយលោក វរសេនីយ៍ទោ យ៉ាវ វណ្ណា ទទួលដើម្បីបន្តវិធានការ៕