ភ្នំពេញ៖ កញ្ញា សេង សុភារី ជាអតីតនិស្សិតនៃសាកលវិទ្យាល័យ ប៊ូរផា (Burapha University) ដែលទើបតែបញ្ចប់ការសិក្សាថ្នាក់បរិញ្ញាបត្រ ជំនាញគីមីចំណីអាហារ កាលពីពេលថ្មីៗនេះ។ ឧស្សាហកម្មចំណីអាហារ កំពុងតែមានការអភិវឌ្ឍ ដូច្នេះជំនាញនេះ ជាជំនាញដែលមានតម្រូវការខ្ពស់នាថ្ងៃអនាគត។
កញ្ញា សុភារី បានប្រាប់ស៊ីស៊ីថាមស៍ថា កញ្ញា បានបញ្ចប់ការសិក្សាថ្នាក់មធ្យមសិក្សាទុតិយភូមិនៅឆ្នាំ ២០១៧ នៃវិទ្យាល័យទួនហ្វា២។ ក្រោយពីបញ្ចប់ការសិក្សាថ្នាក់មធ្យមសិក្សាទុតិយភូមិ កញ្ញាបានបន្ដការសិក្សានៅវិទ្យាស្ថានបច្ចេកវិទ្យាកម្ពុជា (សាលាតិចណូ)។ បន្ទាប់មក កញ្ញាក៏បានប្រឡងអាហារូបករណ៍មកសិក្សានៅប្រទេសថៃ។
កញ្ញា សុភារី បានឱ្យដឹងទៀតថា កញ្ញា បានបន្ដការសិក្សានៅសាកលវិទ្យាល័យ ប៊ូរផា ប្រទេសថៃ ក្នុងខែឧសភា ឆ្នាំ២០១៨ តាមរយៈអាហារូបករណ៍ព្រះរាជទានរបស់ព្រះអង្គម្ចាស់ក្សត្រិយ៍មហាចក្រីសិរិនថន។ ការមកបន្ដការសិក្សានៅសាកលវិទ្យាល័យ ប៊ូរផា កញ្ញា បានជ្រើសរើសសិក្សា ជំនាញគីមីចំណីអាហារ។
កញ្ញា សុភារី បានបន្ដថា ជំនាញគីមីចំណីអាហារ ជាជំនាញមួយដែលមានតម្រូវការខ្ពស់ នាថ្ងៃអនាគត ព្រោះបច្ចុប្បន្ន វិស័យឧស្សាហកម្មចំណីអាហារនៅកម្ពុជា កំពុងមានការអភិវឌ្ឍជាខ្លាំង។ បន្ថែមពីនេះទៀត សុវត្ថិភាពនៃចំណីអាហារមានសារៈសំខាន់ណាស់ចំពោះសង្គម ក្នុងការធានាសុវត្ថិភាព និង គុណភាព របស់អាហារ ។ ជាពិសេសយើងអាចផលិត ផលិតផលអាហារ ដែលមានគុណភាព សុវត្ថិភាព និងអាហារូបត្ថម្ភទៀតផង។
ផលលំបាកដែលកញ្ញា សុភារី បានប្រឈមនោះ គឺមិនខុសពីនិស្សិតដ៏ទៃទៀត ដែលបានបន្ដការសិក្សានៅឯបរទេសនោះឡើយ នោះគឺបញ្ហាភាសា។ ប៉ុន្ដែនៅពេលដែលកញ្ញាបានទៅដល់ប្រទេសថៃ នៅទីនោះមានកម្មវិធីសិក្សាភាសាថៃរយៈពេលបីខែ ដែលអាចឱ្យកញ្ញា ធ្វើការទំនាក់ទំនងជាមួយជនជាតិថៃបាន។ បន្ថែមពីនេះទៀត កញ្ញាក៏បានសិក្សាភាសាថៃខ្លះៗ មុននឹងទៅសិក្សានៅប្រទេសថៃផងដែរ៕
