អ៊ុយក្រែន៖ កងកម្លាំងប្រដាប់អាវុធរុស្ស៊ី បានបន្តប្រតិបត្តិការយោធាពិសេសរបស់ខ្លួនក្នុងប្រទេសអ៊ុយក្រែន ខណៈដែលប្រធានាធិបតីអ៊ុយក្រែនលោក វូឡូឌីមី ហ្សេឡែនស្គី (Volodymyr Zelensky) បាននិយាយថា គាត់មានឆន្ទៈជួបជាមួយប្រធានាធិបតីរុស្ស៊ីលោក វ្លាឌីមៀ ពូទីន (Vladimir Putin) ដើម្បីបញ្ចប់សង្គ្រាម។
កងកម្លាំងប្រដាប់អាវុធរុស្ស៊ីកាលពីថ្ងៃអាទិត្យ បានចាប់ផ្តើមការងារដើម្បីដោះមីន និងសម្អាតកម្ទេចកម្ទីដែលនៅឆ្ងាយពីតំបន់ជុំវិញរោងចក្រ Azovstal ក្នុងទីក្រុង Mariupol ដែលជាកន្លែងនៃការប្រយុទ្ធគ្នាដ៏ខ្លាំងក្លាបំផុតនៅក្នុងជម្លោះដែលកំពុងបន្តជាមួយអ៊ុយក្រែន។
យោងតាមទាហានរុស្ស៊ី គ្រឿងផ្ទុះជាង ១០០ គ្រាប់ត្រូវបានបោសសម្អាតក្នុងរយៈពេល ២ ថ្ងៃ កន្លងមកនេះ ដោយទាហានម្នាក់បានប៉ាន់ស្មានថា ការងាររហូតដល់ពីរសប្តាហ៍អាចត្រូវបានទាមទារ ដើម្បីដោះមីន។
យោងតាមអ្នកនាំពាក្យក្រសួងការពារជាតិរុស្ស៊ី លោក Igor Konashenkovon កាលពីថ្ងៃចន្ទម្សិលមិញ កងទ័ពរុស្ស៊ី បានប្រើប្រាស់មីស៊ីលរយៈចម្ងាយឆ្ងាយដែលមានមូលដ្ឋានលើសមុទ្រ ដើម្បីវាយប្រហារលើអាវុធ និងសម្ភារៈយោធា ដែលត្រូវបានផ្ទេរទៅកាន់តំបន់ Donbass ដោយកងពលតូច នៃកងកម្លាំងប្រដាប់អាវុធអ៊ុយក្រែន។
អគ្គសេនាធិការនៃកងកម្លាំងប្រដាប់អាវុធអ៊ុយក្រែន បាននិយាយនៅលើប្រព័ន្ធផ្សព្វផ្សាយសង្គមកាលពីថ្ងៃចន្ទថា កងកម្លាំងអ៊ុយក្រែនបានប្រយុទ្ធជាមួយកងកម្លាំងអាកាសរុស្ស៊ីនៅភាគខាងលិចរដ្ឋ Lviv ។ ក្នុងពេលប្រយុទ្ធ កម្លាំងអ៊ុយក្រែនបានបំផ្លាញរថយន្តយោធាពីរគ្រឿងពីខាងរុស្ស៊ី និងបានសម្លាប់ទាហានជាច្រើននាក់។ ការបាត់បង់កងទ័ពអ៊ុយក្រែន និងពេលវេលា និងទីតាំងនៃការប្រយុទ្ធមិនត្រូវបានគេបង្ហាញឱ្យដឹងនោះទេ។
យោងតាមទីភ្នាក់ងារសារព័ត៌មាន UNIAN របស់ប្រទេសអ៊ុយក្រែនកាលពីថ្ងៃចន្ទ លោកប្រធានាធិបតី Zelensky បាននិយាយថា លោកបានត្រៀមខ្លួនជាស្រេចដើម្បីជួបជាមួយលោក Putin ដើម្បីពិភាក្សាអំពីបទឈប់បាញ់។
រដ្ឋមន្ត្រីការពារជាតិអាមេរិក លោក Lloyd Austin បាននិយាយកាលពីថ្ងៃចន្ទថា ប្រទេសចំនួន ២០ បានប្រកាសអំពីកញ្ចប់ជំនួយសន្តិសុខថ្មី សម្រាប់អ៊ុយក្រែន បន្ទាប់ពីបានរៀបចំកិច្ចប្រជុំនិម្មិតជាមួយសម្ព័ន្ធមិត្តរបស់ខ្លួន។ ពួកគេនឹងផ្គត់ផ្គង់អ៊ុយក្រែនជាមួយនឹងគ្រាប់កាំភ្លើងធំ ប្រព័ន្ធការពារឆ្នេរ រថក្រោះ និងរថពាសដែកផ្សេងទៀត៕
