ក្រុងឡុងដ៍៖ អាជ្ញាធរសុខាភិបាលចក្រភពអង់គ្លេស នៅថ្ងៃចន្ទ ទី២៣ ខែឧសភា បាននិយាយថា ពួកគេបានរកឃើញករណីជំងឺអ៊ុតស្វាថ្មីចំនួន ៣៦ករណីបន្ថែមទៀតនៅក្នុងប្រទេសអង់គ្លេសនិងការឆ្លងដំបូងគេនៅក្នុងប្រទេសស្កុតឡែន ដែលបណ្តាលឲ្យការឆ្លងសរុបមានចំនួន៥៦ករណី។
ទីភ្នាក់ងារសន្តិសុខសុខភាពចក្រភពអង់គ្លេស (UKHSA) បាននិយាយថា ករណីថ្មីបានយកចំនួនសរុបនៃការបញ្ជាក់នៅក្នុងប្រទេសអង់គ្លេសចាប់តាំងពី៧ករណី ដល់ ៥៦ករណី ប៉ុន្តែមន្រ្តីបានសង្កត់ធ្ងន់ថា ទោះបីជាការផ្ទុះឡើងមានការព្រួយបារម្ភក៏ដោយ ហានិភ័យចំពោះជនជាតិអង់គ្លេសនៅតែមានកម្រិតទាប។
ដោយឡែកនាយករដ្ឋមន្ត្រីអង់គ្លេសលោក Boris Johnson បាននិយាយថា រដ្ឋាភិបាលរបស់លោកកំពុងពិនិត្យយ៉ាងយកចិត្តទុកដាក់លើកាលៈទេសៈជុំវិញការដោះស្រាយពីបញ្ហាជំងឺឆ្លងថ្មីមួយនេះ។ លោកចនសុនបន្តថា "ជាទូទៅវាជាជំងឺដ៏កម្រមួយ ហើយរហូតមកដល់ពេលនេះ ផលវិបាកហាក់ដូចជាមិនធ្ងន់ធ្ងរខ្លាំងនោះទេ ប៉ុន្តែវាសំខាន់ដែលយើងត្រូវតាមដានវា" ដោយការឆ្លងជាធម្មតាមិនរីករាលដាលយ៉ាងងាយស្រួលរវាងមនុស្សនោះទេ។
ជាមួយគ្នានេះដែរលោកវេជ្ជបណ្ឌិត Susan Hopkins ប្រធានទីប្រឹក្សាផ្នែកវេជ្ជសាស្រ្ដរបស់ UKHSA បាននិយាយនៅក្នុងសេចក្តីថ្លែងការណ៍មួយថា "ទន្ទឹមនឹងរបាយការណ៍នៃករណីបន្ថែមទៀតដែលត្រូវបានកំណត់អត្តសញ្ញាណនៅក្នុងប្រទេសផ្សេងទៀតនៅទូទាំងពិភពលោក យើងបន្តកំណត់អត្តសញ្ញាណករណីបន្ថែមនៅក្នុងចក្រភពអង់គ្លេស" ។ លោកបន្តថា "សមាមាត្រគួរឱ្យកត់សម្គាល់នៃករណីថ្មីៗនៅក្នុងចក្រភពអង់គ្លេស និងអឺរ៉ុបត្រូវបានរកឃើញចំពោះបុរសស្រឡាញ់ភេទដូចគ្នា ដូច្នេះយើងកំពុងលើកទឹកចិត្តជាពិសេសបុរសទាំងនេះឱ្យប្រុងប្រយ័ត្នចំពោះរោគសញ្ញា" ។
គួរបញ្ជាក់ថា UKHSA បានណែនាំថាទំនាក់ទំនងជិតស្និទ្ធដែលមានហានិភ័យខ្ពស់នៃករណីដែលបានបញ្ជាក់គួរតែនៅដាច់ដោយឡែករយៈពេល ២១ ថ្ងៃ ប្រសិនបើខ្លួនមានអាការះកំពុងកើតមានមេរោគថ្មីជំងឺអុតស្វានេះ៕
