តួកគី៖ ប្រធានាធិបតីតួកគីលោក Recep Tayyip Erdogan បាននិយាយកាលពីថ្ងៃចន្ទថា ប្រទេសតួកគីនឹងចាប់ផ្តើមប្រតិបត្តិការយោធាថ្មីមួយនៅភាគខាងជើងប្រទេសស៊ីរីនាពេលឆាប់ៗនេះ។ ទោះបីជាលោកមិនបានផ្តល់ព័ត៌មានជាក់លាក់ណាមួយក៏ដោយ ប៉ុន្តែការលុកលុយនេះទំនងជាសំដៅទៅលើតំបន់ដែលកាន់កាប់ដោយកងជីវពលឃឺដ។ ដោយលោក Erdogan បាននិយាយបែបនេះបន្ទាប់ពីកិច្ចប្រជុំគណៈរដ្ឋមន្ត្រី។
យោងទៅតាមសារព័ត៌មាន AP លោក Erdogan បាននិយាយថា តួកគីនឹងចាត់វិធានការថ្មីឆាប់ៗនេះ ទាក់ទងនឹងផ្នែកមិនពេញលេញនៃគម្រោងដែលបានចាប់ផ្តើមនៅតំបន់សុវត្ថិភាពជម្រៅ ៣០ គីឡូម៉ែត្រ ដែលបានបង្កើតនៅតាមព្រំដែនភាគខាងត្បូងរបស់តួកគី។
ទីក្រុងអង់ការ៉ាបានបញ្ជូនកងទ័ពចូលទៅក្នុងប្រទេសស៊ីរីចំនួនបីដងរួចមកហើយ ដោយចាប់ផ្តើមពីប្រតិបត្តិការ Euphrates Shield ក្នុងឆ្នាំ ២០១៦។ ការវាយលុយថ្មីៗបំផុតគឺ ប្រតិបត្តិការឆ្នាំ ២០១៩ ដែលត្រូវបានទណ្ឌកម្មដោយសហរដ្ឋអាមេរិក និងសង្រ្គាមពាក្យសម្តីរវាងលោក Erdogan និងប្រធានាធិបតីបារាំង Emmanuel Macron ។ តួកគីបច្ចុប្បន្នគ្រប់គ្រងផ្នែកខ្លះនៃអភិបាលក្រុង Aleppo, Raqqa និង Hasakah របស់ស៊ីរី។
កាលពីខែមុន ប្រទេសតួកគីក៏បានបញ្ជូនទាហានចូលទៅក្នុងប្រទេសអ៊ីរ៉ាក់ផងដែរ ដោយផ្តោតលើក្រុមជីវពលឃឺដនៅតំបន់ភាគខាងជើងនៃ Metina, Zap និង Avasin-Basyan នៅក្នុងអ្វីដែលខ្លួនហៅថាប្រតិបត្តិការ Claw-Lock ។ ទីក្រុងបាកដាដបានថ្កោលទោសប្រតិបត្តិការនេះថាជាការរំលោភលើអធិបតេយ្យភាពរបស់អ៊ីរ៉ាក់។
ថ្មីៗនេះ លោក Erdogan បានសម្តែងការជំទាស់ចំពោះប្រទេសហ្វាំងឡង់ និងស៊ុយអែត ក្នុងការចូលរួមជាមួយអង្គការណាតូ ដោយសារតែការពិតរដ្ឋាភិបាលទាំងពីរ បានផ្តល់សិទ្ធិជ្រកកោននយោបាយដល់សកម្មជនឃឺដមួយចំនួន ដែលតួកគីចាត់ទុកថាជាភេរវករ៕
