អូទ្រីសបើកគណនីប្រាក់រូប្លឹសដើម្បីទូទាត់ថ្លៃឧស្ម័នរុស្ស៊ី

អូទ្រីស៖ ក្រុមហ៊ុនថាមពលអូទ្រីស OMV បានរួមគ្នាជាមួយក្រុមហ៊ុនអ៊ឺរ៉ុបផ្សេងទៀតក្នុងការបើកគណនីប្រាក់រូប្លឹសដើម្បីទូទាត់ថ្លៃឧស្ម័នធម្មជាតិរបស់រុស្ស៊ី។

ក្រុមហ៊ុនប្រេង និងឧស្ម័នបាននិយាយកាលពីថ្ងៃសុក្រថា ខ្លួនបានបើកគណនីមួយជាមួយធនាគារ Gazprombank របស់រុស្ស៊ី ដើម្បីទូទាត់ការនាំចូលឧស្ម័ន។ អូទ្រីសបាននាំចូលប្រហែល ៨០ ភាគរយនៃឧស្ម័នរបស់ខ្លួនពីរុស្ស៊ី។

ក្រុមហ៊ុនទទូចថា គម្រោងនេះមិនបំពានលើការដាក់ទណ្ឌកម្មរបស់សហភាពអឺរ៉ុបបច្ចុប្បន្នប្រឆាំងនឹងក្រុងម៉ូស្គូទេ។

ប្រធានាធិបតីរុស្ស៊ី លោក វ្ល៉ាឌីមៀ ពូទីន បានចុះហត្ថលេខាលើក្រឹត្យប្រធានាធិបតីកាលពីថ្ងៃទី ៣១ ខែមីនា ស្តីពីច្បាប់ថ្មីនៃពាណិជ្ជកម្មឧស្ម័នធម្មជាតិជាមួយប្រទេស និងតំបន់ "មិនរាក់ទាក់" ដោយប្តេជ្ញាបញ្ឈប់ការផ្គត់ផ្គង់ឧស្ម័នដល់អ្នកទិញពីប្រទេស និងតំបន់ទាំងនេះ លុះត្រាតែពួកគេប្តូរទៅការទូទាត់ជាប្រាក់រូប្លឹសចាប់ពីថ្ងៃទី ១ ខែមេសា។

គិតត្រឹមថ្ងៃព្រហស្បតិ៍នេះ ប្រហែលពាក់កណ្តាលនៃអ្នកនាំចូលឧស្ម័នចំនួន ៥៤ របស់រុស្ស៊ីបានបើកគណនីប្រាក់រូប្លឹសជាមួយ Gazprombank ដោយអនុលោមតាមច្បាប់ថ្មីរបស់រុស្ស៊ី នេះបើយោងតាមឧបនាយករដ្ឋមន្ត្រីរុស្ស៊ី Alexander Novak ៕