រុស្ស៊ី៖ សមាជិកព្រឹទ្ធសភារុស្ស៊ី លោក Andrey Klimov បាននិយាយកាលពីពេលថ្មីៗនេះថា ប្រតិបត្តិការយោធាពិសេសរបស់ប្រទេសរុស្ស៊ី មិនផ្ដោតលើប្រជាជនអ៊ុយក្រែននោះទេ ខណៈដែលខ្លួនព្យាយាមកាត់បន្ថយចំនួនជនស៊ីវិល និងការខូចខាតដល់ហេដ្ឋារចនាសម្ព័ន្ធស៊ីវិលនៅក្នុងប្រទេសអ៊ុយក្រែន។
ថ្លែងជាមួយបណ្តាញទូរទស្សន៍ពិភពលោកចិន (CGTN) កាលពីថ្ងៃអង្គារសប្តាហ៍មុន លោក Andrey Klimov អនុប្រធានគណៈកម្មាធិការក្រុមប្រឹក្សាសហព័ន្ធរុស្ស៊ីទទួលបន្ទុកកិច្ចការបរទេសបាននិយាយថា ជម្លោះនៅក្នុងប្រទេសអ៊ុយក្រែនមិនផ្តោតលើប្រជាជនអ៊ុយក្រែននោះទេ។
ពីរខែបានកន្លងផុតទៅចាប់តាំងពីប្រទេសរុស្ស៊ី បានចាប់ផ្តើម "ប្រតិបត្តិការយោធាពិសេស" នៅក្នុងប្រទេសជិតខាងអ៊ុយក្រែន។ ប្រទេសទាំងពីរបានឆ្លងកាត់ការចរចាហើយដំណោះស្រាយសន្តិភាពចុងក្រោយនៅមិនទាន់មកដល់នៅឡើយទេ។
ចាប់តាំងពីការផ្ទុះឡើងនៃជម្លោះរុស្ស៊ី-អ៊ុយក្រែនមក ប្រទេសលោកខាងលិចជាច្រើន បាននិងកំពុងគាំទ្រអ៊ុយក្រែនដោយអាវុធ និងដាក់ទណ្ឌកម្មរុស្ស៊ី។ សហភាពអឺរ៉ុបដែលនាំចូលប្រហែល ៤០ ភាគរយនៃឧស្ម័នធម្មជាតិរបស់ខ្លួនពីប្រទេសរុស្ស៊ីបានមើលឃើញថាតម្លៃឧស្ម័នកើនឡើងដោយសារតែការដាក់ទណ្ឌកម្មលើថាមពលរុស្ស៊ី។
លោក Klimov បាននិយាយថា «ប្រទេសដែលដាក់ទណ្ឌកម្មប្រឆាំងនឹងរុស្ស៊ីនឹងរងទុក្ខកាន់តែច្រើនពីទង្វើរបស់ពួកគេ ហើយរុស្ស៊ីគឺជាមហាអំណាចយោធាដែលអាចការពារប្រឆាំងនឹងការឈ្លានពានណាមួយ»។ លោកបន្តថា អឺរ៉ុប គឺជាប្រទេសដំបូងគេ ដែលទទួលការវាយប្រហារពីវិធានការតបតរបស់រុស្ស៊ី បន្ទាប់មកគឺកាណាដា នូវែលសេឡង់ អូស្ត្រាលី ជប៉ុន និងកូរ៉េខាងត្បូង៕
