ការដាក់ទណ្ឌកម្មប្រេងរបស់អឺរ៉ុបអាចនឹងបង្កើនតម្លៃប្រេងរបស់រុស្ស៊ី

ស្វីស៖ លោក Norbert Rucker ប្រធានផ្នែកសេដ្ឋកិច្ច និងស្រាវជ្រាវនៅ Julius Baer បានឱ្យដឹងថា ការហាមឃាត់ការនាំចូលប្រេងឆៅរបស់រុស្ស៊ីដែលស្នើឡើង ដោយអាជ្ញាធរសហភាពអឺរ៉ុបនឹងបង្កើនប្រាក់ចំណូលប្រេងរបស់ទីក្រុងម៉ូស្គូ។

យោងតាមអ្នកជំនាញ ការហាមប្រាមនេះត្រូវបានគេរំពឹងថានឹងធ្វើឱ្យតម្លៃប្រេងឆៅសកលកើនឡើងបន្ថែមទៀត ដែលបានកើនឡើងដល់ ១២០ដុល្លារ ក្នុងមួយបារ៉ែលដូចនៅក្នុងខែមីនា ដោយជួយរុស្ស៊ីដែលរងទណ្ឌកម្មក្នុងការបង្កើនប្រាក់ចំណូលប្រេងរបស់ខ្លួន។

អ្នកវិភាគបាននិយាយនៅក្នុងបទសម្ភាសន៍ជាមួយសារព័ត៌មានស្វីសថា ផលប៉ះពាល់នៃការហាមឃាត់លើរុស្ស៊ីគឺ "អាចជជែកគ្នាបាន" ដោយបន្ថែមថា EU អាចមានជម្រើសប្រសើរជាងនេះ ក្នុងការធ្វើឱ្យរុស្ស៊ីចុះខ្សោយ ដូចជាពន្ធដារជាដើម។

កាលពីដើមសប្តាហ៍នេះ សហភាពអឺរ៉ុបបានបង្ហាញផែនការហាមឃាត់ការនាំចូលប្រេងពីរុស្ស៊ីសម្រាប់ប្រទេសជាសមាជិកទាំង ២៧ របស់ខ្លួន។ វិធានការនេះដែលគ្រោងនឹងប៉ះពាល់ដល់ហិរញ្ញវត្ថុជាតិរបស់រុស្ស៊ីបានមកជាផ្នែកនៃយុទ្ធនាការដាក់ទណ្ឌកម្មមិនធ្លាប់មានពីមុនមក ដែលបានចាប់ផ្តើមដោយលោកខាងលិចប្រឆាំងនឹងក្រុងម៉ូស្គូជុំវិញប្រតិបត្តិការយោធារបស់ខ្លួនក្នុងប្រទេសអ៊ុយក្រែន។

លោក Rucker បានបន្តថា ជំហានបែបនេះនឹងធ្វើឱ្យមានការលំបាកសម្រាប់ប្រទេសរុស្ស៊ីដែលសម្បូរថាមពលក្នុងការស្វែងរកអ្នកទិញសម្រាប់ប្រេងឆៅរបស់ខ្លួននៅទូទាំងពិភពលោក។

លោក Rucker បាននិយាយថា "ការហាមឃាត់ប្រេងប៉ះពាល់ប្រទេសស្វីសតែដោយប្រយោលប៉ុណ្ណោះ" ដោយប្រទេសនេះទទួលបានប្រេងភាគច្រើនរបស់ខ្លួនពីរោងចក្រចម្រាញ់ប្រេងនៅអឺរ៉ុប ដែលបានគាំទ្រការប្តូរទៅជម្រើសជំនួសរួចហើយ៕