វ៉ាស៊ីនតោន៖ សម្ព័ន្ធមិត្តរបស់សហរដ្ឋអាមេរិក បានជួយជំរុញកងនាវាចម្បាំងរបស់អ៊ុយក្រែនដោយការបរិច្ចាគគ្រឿងបន្លាស់ដែលត្រូវការដើម្បីធ្វើឱ្យយន្តហោះជាច្រើនអាចដំណើរការបាន ខណៈដែលការប្រយុទ្ធជាមួយរុស្ស៊ីកាន់តែក្តៅនៅក្នុងតំបន់ Donbass ក្នុងប្រទេសអ៊ុយក្រែន។
បើតាមមន្រ្តីអាម៉េរិកបានឲ្យដឹងថា ទីក្រុងវ៉ាស៊ីនតោនមិនអាចផ្តល់អាវុធសាហាវមួយចំនួនដែលក្រុងគៀវបានស្នើសុំនោះ ព្រោះអាចធ្វើអោយរុស្សីយល់ឃើញថាអាម៉េរិកមានចេតនាលូកដៃចូលជួយអ៊ុយក្រែនប្រឆាំងនឹងរុស្សី។
អ្នកនាំពាក្យមន្ទីបញ្ចេកោណ លោក Kirby បាននិយាយថា "ពួកគេបានទទួលការគាំទ្រ ដើម្បីទទួលបានយន្តហោះស្លាបថេរមួយចំនួនរបស់ពួកគេ អាចដំណើរការបានម្តងទៀត" ។ លោកបន្ត ឥឡូវនេះ ពួកគេមានយន្តហោះចម្បាំងស្លាបថេរ ច្រើនជាងអ្វីដែលពួកគេបានធ្វើកាលពីពីរសប្តាហ៍មុន។ នោះមិនមែនដោយចៃដន្យទេ នោះក៏ព្រោះតែប្រទេសផ្សេងទៀតដែលមានបទពិសោធជាមួយនឹងប្រភេទយន្តហោះទាំងនោះអាចជួយពួកគេឲ្យមានយន្តហោះកាន់តែច្រើនឡើង»។
យ៉ាងណាមិញ លោក Kirby មិនបានកំណត់អត្តសញ្ញាណប្រទេសដែលពាក់ព័ន្ធនឹងការដឹកជញ្ជូនគ្រឿងបន្លាស់ទេ។ គាត់ក៏មិនបានប្រាប់ពីចំនួន ឬប្រភេទយន្តហោះដែលត្រូវបានជួសជុល និងដាក់ឱ្យដំណើរការឡើងវិញដែរ។ សហរដ្ឋអាមេរិក និងសមាជិកណាតូផ្សេងទៀតបានពន្លឿនការដឹកជញ្ជូនអាវុធទៅកាន់អ៊ុយក្រែនក្នុងប៉ុន្មានសប្តាហ៍ថ្មីៗនេះ ដោយលើកឡើងពីការវាយប្រហាររបស់រុស្ស៊ីលើជនស៊ីវិល។
ទីក្រុងមូស្គូបានបដិសេធមិនកំណត់គោលដៅលើជនស៊ីវិល និងបានចោទប្រកាន់ក្រុងកៀវពីបទប្រព្រឹត្តឧក្រិដ្ឋកម្មសង្រ្គាម ដើម្បីរៀបចំមតិសាធារណៈអំពីជម្លោះ។
ទន្ទឹមនឹងនេះលោក នាយករដ្ឋមន្ត្រីអង់គ្លេស លោក Boris Johnson បាននិយាយកាលពីថ្ងៃអង្គារថា លោកបានផ្តល់អនុសាសន៍ដល់លោក Biden កាលពីសប្តាហ៍មុនថា ប្រទេសលោកខាងលិច អនុវត្តការកសាងកងកម្លាំងយោធារបស់អ៊ុយក្រែនរយៈពេលវែង។
លោកបានប្រាប់សមាជិកសភាចក្រភពអង់គ្លេសថា "ខ្ញុំបានស្នើថា គោលដៅរយៈពេលវែងរបស់យើងត្រូវតែពង្រឹង អ៊ុយក្រែនដល់ចំណុចដែលរុស្ស៊ីនឹងមិនហ៊ានឈ្លានពានម្តងទៀត"៕
