អ៊ីរ៉ង់៖ អ្នកជំនាញម្នាក់បាននិយាយថា អ៊ីរ៉ង់គឺជាកត្តាសំខាន់ក្នុងការកំណត់អនាគតនៃតម្លៃប្រេងឆៅពិភពលោក ក៏ដូចជាសន្តិសុខនៃការដំឡើងប្រេងរបស់អារ៉ាប៊ីសាអូឌីត ខណៈដែលវិបត្តិដែលកំពុងបន្តនៅក្នុងប្រទេសអ៊ុយក្រែន បានជំរុញឱ្យមានការព្រួយបារម្ភជាសកលអំពីកង្វះការផ្គត់ផ្គង់ប្រេង និងបានធ្វើឱ្យតម្លៃកើនឡើង។
បន្ទាប់ពីការវាយប្រហារដោយមីស៊ីលកាលពីសប្តាហ៍មុនទៅលើកន្លែងចែកចាយប្រេង Aramco ក្នុងប្រទេសអារ៉ាប៊ីសាអូឌីត តម្លៃប្រេងឆៅបានកើនឡើងជាងមួយភាគរយដល់ជាង ១២០ ដុល្លារអាមេរិកក្នុងមួយបារ៉ែល។ បូករួមទាំងប៉ុន្មានសប្តាហ៍មុននេះ សហរដ្ឋអាមេរិក និងអឺរ៉ុបបានហាមឃាត់ការនាំចូលប្រេងពីរុស្ស៊ី ធ្វើឲ្យតម្លៃប្រេងឡើងខ្ពស់បំផុតចាប់តាំងពីឆ្នាំ ២០០៨ ។
មន្ត្រីក្រសួងថាមពលអារ៉ាប៊ីសាអូឌីតបាននិយាយថា ការវាយប្រហារសងសឹកបែបនេះដោយក្រុម ហូធី ដែលផ្តើមចេញពីសកម្មភាពយោធារបស់ទីក្រុងរីយ៉ាដ ក្នុងប្រទេសយេម៉ែនអាចប៉ះពាល់ដល់សមត្ថភាពរបស់អារ៉ាប៊ីសាអូឌីតក្នុងការបំពេញកាតព្វកិច្ចថាមពលចំពោះទីផ្សារពិភពលោក។
លោក Saeed Laylaz អ្នកវិភាគសេដ្ឋកិច្ចអ៊ីរ៉ង់បាននិយាយថា "អ្វីដែល ក្រុមហូធី នឹងធ្វើចំពោះគ្រឿងរោងចក្រ Aramco គឺអាស្រ័យលើភាពចម្រូងចម្រាសរវាងអ៊ីរ៉ង់ និងអាមេរិក។ ប្រសិនបើកិច្ចព្រមព្រៀងនុយក្លេអ៊ែរអ៊ីរ៉ង់ ឬ JCPOA ត្រូវបានរស់ឡើងវិញ ទុនបម្រុងប្រេងអ៊ីរ៉ង់ពី ១០០ ទៅ ១៥០ លានបារ៉ែលនឹងត្រូវបានចាក់ចូលទៅក្នុងទីផ្សារនោះ អ៊ីរ៉ង់នឹងផ្គត់ផ្គង់ប្រហែល ២ លាន។
ក្នុងខែកុម្ភៈ ផលិតកម្មប្រេងរបស់អារ៉ាប៊ីសាអូឌីតបានលើស ១០ លានបារ៉ែលក្នុងមួយថ្ងៃ។ ប្រទេសនេះមានសមត្ថភាពផលិតប្រេង២លានបារ៉ែលទៀតក្នុងមួយថ្ងៃ។
ទីភ្នាក់ងារថាមពលអន្តរជាតិបានព្យាករណ៍ថា ការដាក់ទណ្ឌកម្មលើទីក្រុងមូស្គូដោយទីក្រុងវ៉ាស៊ីនតោន និងសហភាពអឺរ៉ុបនឹងកាត់បន្ថយការនាំចេញប្រេងរបស់រុស្ស៊ីចំនួន ៣០ ភាគរយនៅក្នុងខែមេសា។
អ៊ីរ៉ង់និយាយថា ខ្លួនបានឈានដល់កម្រិតខ្ពស់បំផុតនៃការនាំចេញប្រេងឆៅ និងប្រាក់ចំណូលចាប់តាំងពីការដាក់ទណ្ឌកម្មមកលើប្រទេសក្នុងឆ្នាំ ២០១៨។ រដ្ឋមន្ត្រីប្រេងរបស់ប្រទេសនេះនិយាយថា អ៊ីរ៉ង់គ្រោងនឹងបង្កើនផលិតកម្មប្រេងរបស់ខ្លួនដល់ ៥.៧ លានបារ៉ែលក្នុងមួយថ្ងៃ៕
