ទីភ្នាក់ងារទេសចរណ៍៖វីរុសបំប្លែងខ្លួន«Omicron»អាចជះឥទ្ធិពលដល់អ្នកទេសចរមកកម្ពុជា

ភ្នំពេញ៖រាជរដ្ឋាភិបាលកម្ពុជា បានប្រកាសបើកឱ្យដំណើរការភ្ញៀវទេសចរដែលចាក់វ៉ាក់សាំងគ្រប់ដូស ដោយផ្តើមដំបូងនៅគោលដៅចំនួន ៣ រួមមាន ក្រុងព្រះសីហនុ ក្រុងកោះរ៉ុង និងតំបន់តារាសាគរ ចាប់ពីថ្ងៃទី៣០ ខែវិច្ឆិកា។ប៉ុន្តែបច្ចុប្បន្នេះកម្ពុជាមិនទាន់ទទួលបានការទាក់ទងពីភ្ញៀវទេសចរបរទេសច្រើននៅឡើយទេ ខណៈបច្ចុប្បន្នពិភពលោកកំពុងមានភាពភ័យខ្លាំចពីមេរោគបំប្លែងថ្មី Omicron ហើយវីរុសបំប្លែងខ្លួន«Omicron»អាចជះឥទ្ធិពលដល់អ្នកទេសចរដែលចង់មកកម្ពុជា។

លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា បានប្រាប់ស៊ីស៊ីថាមស៍នៅថ្ងៃនេះថា បច្ចុប្បន្នកម្ពុជាមិនទាន់ទទួលបានភ្ញៀវទេសចរបរទេសច្រើននៅឡើយទេ ដោយសារតែកម្ពុជាត្រូវការ ការត្រៀមលក្ខណៈឱ្យរួចរាល់ និងការរៀបចំជាច្រើនទៀត ជាពិសេសគឺការដឹកជញ្ជូនតាមផ្លូវអាកាសដែលត្រូវការរៀបចំច្រើនសម្រាប់ទទួលភ្ញៀវទេសចរ។

លោកស្រីរំពឹងថា កម្ពុជាអាចទទួលភ្ញៀវទេសចរបរទេសបានច្រើននៅក្នុងខែធ្នូខាងមុខនេះ ព្រោះការត្រៀមលក្ខណៈសម្រាប់ការហោះហើរអាចនឹងចាប់ផ្តើមដំណើរការបាននៅក្នុងខែធ្នូ។ ទោះបីជាកម្ពុជាមិនទាន់ទទួលបានទេសចរបរទេស តែកម្ពុជាក៏នៅមានទេសចរណ៍ក្នុងស្រុក ដែលជាកត្តាជួយទ្រទ្រង់សេដ្ឋកិច្ចជាតិបានមួយផ្នែកដែរ។

មួយវិញទៀត លោកស្រីក៏មានការព្រួយបារម្ភចំពោះមេរោគកូវីដ-១៩ថ្មី ប្រភេទអូមីក្រុង ដែលអាចធ្វើឱ្យប៉ះពាល់ដល់ដំណើរទេសចរមកកាន់កម្ពុជាផងដែរ។ ប៉ុន្តែ ក្រសួងសុខាភិបាលកម្ពុជាក៏បានហាមឃាត់អ្នកដំណើរ ឬអ្នកដែលបានឆ្លងកាត់ប្រទេសចំនួន១០នៅទ្វីបអាហ្រិ្វកមិនឱ្យចូលមកកម្ពុជា ដើម្បីការពារការឆ្លងចូលកម្ពុជានូវមេរោគកូវីដ-១៩ ប្រភេទអូមីក្រុង។

យោងតាមអាកាសចរស៊ីវិល បានឱ្យដឹងថា ចាប់ពីខែធ្នូ ឆ្នាំ២០២១ទៅ ចំនួនជើងហោះហើរសរុបនឹងមានការកើនឡើងក្នុង១សប្តាហ៍រហូតដល់៤៣ជើង/សប្តាហ៍ ធៀបទៅនឹងខែមុន(ខែតុលា ឆ្នាំ២០២១) គឺមានការកើនឡើង១៦% (កើនឡើងពី៣៧ជើង ទៅ៤៣ជើង/សប្តាហ៍) គិតត្រឹមថ្ងៃទី ២៧ ខែវិច្ឆកា ឆ្នាំ២០២១ ។ ចំនួនជើងហោះហើរនេះអាចនឹងមានការប្រែប្រួល ទៅតាមការវិវត្តនៃស្ថានភាពជាក់ស្តែង នៃការគ្រប់គ្រងការរីករាលដាលនៃ ជំងឺកូវីដ-១៩»។

តែយ៉ាងណាក៏ដោយ ការបើកទទួលភ្ញៀវទេសចរចាក់វ៉ាក់សាំងរបស់កម្ពុជាពេលនេះ ធ្វើឡើងខណៈពេលដែលពិភពលោកកំពុងភ័យខ្លាចនឹងវីរុសបំប្លែងខ្លួនកាចសាហាវ Omicron។បច្ចុប្បន្នប្រទេស និង ដែនដីចំនួន ១១ហើយបានរកឃើញវីរុសនេះ។

នៅចំពោះមុខបញ្ហាស្រួចស្រាល់ជាថ្មី នៃការសាយភាយជំងឺកូវីដ-១៩ ប្រភេទបំប្លែងថ្មី «អូមីក្រុង» ក្រសួងសុខាភិបាលកម្ពុជា បានសម្រេចបិទមិនទទួលអ្នកដំណើរ ឬអ្នកដែលធ្លាប់ឆ្លងកាត់ប្រទេសចំនួនដប់ ក្នុងទ្វីបអាហ្រិ្វក ក្នុងអំឡុងពេលបីសប្តាហ៍មុនមកដល់កម្ពុជា រួមមាន ប្រទេសបូតស្វាណា អេសវ៉ាទីនី ឡេសូតូ ម៉ូសំប៊ិក ណាមីប៊ី អាហ្វ្រិកខាងត្បូង ហ្ស៊ីមបាវ៉េ ម៉ាឡាវី អេនហ្គោឡា និងប្រទេសហ្សំប៊ី។ នេះបើតាមសេចក្តីប្រកាសព័ត៌មានរបស់ក្រសួងសុខាភិបាល ចុះនៅថ្ងៃទី២៩វិច្ឆិកា៕