ជនជាតិចិន-ខ្មែរ៤នាក់ក្នុងចំណោម៣៦នាក់ដែលលួចឆ្លងចូលកម្ពុជាវិជ្ជមានកូវីដ

ភ្នំពេញ៖ជនជាតិចិនចំនួន០៣នាក់ និងខ្មែរ០១នាក់ ក្នុងចំណោម៣៦នាក់ដែលលួចឆ្លងដែនខុសច្បាប់មកកម្ពុជា ត្រូវបានតេស្តឃើញវិជ្ជមានកូវីដ-១៩ ហើយមនុស្សមួយចំនួនទៀតត្រូវបានឃុំខ្លួនជាបណ្តោះអាសន្ន។ នេះបើតាមប្រសាសន៍របស់នាយឧត្តមសេនីយ៍ កែវ វណ្ណថន អគ្គនាយករង និងជាអ្នកនាំពាក្យនៃអគ្គនាយកដ្ឋានអន្តោប្រវេសន៍ បានថ្លែងប្រាប់ស៊ីស៊ីថាមស៍នៅថ្ងៃទី៣០ ខែកក្កដា ឆ្នាំ២០២១។

នាយឧត្តមសេនីយ៍ កែវ វណ្ណថន បានលើកឡើងថា បច្ចុប្បន្នជនជាតិចិន-ខ្មែរដែលវិជ្ជមានកូវីដ-១៩ កំពុងសម្រាកព្យាបាលនៅមន្ទីរពេទ្យបង្អែកខេត្តព្រះសីហនុ។ ចំពោះអ្នកដទៃទៀត ត្រូវបានឃុំខ្លួនបណ្ដោះអាសន្ននៅខេត្តព្រះសីហនុ មិនបានបញ្ជូនមកភ្នំពេញទេ ព្រោះរង់ចាំការសម្រេចពីតុលាការ។

គួរបញ្ជាក់ថា កម្លាំងល្បាតរបស់អង្គភាពបង្ក្រាបបទល្មើសលើផ្ទៃសមុទ្រ នៃនាយកដ្ឋាននគរបាលការពារព្រំដែនទឹក នៅវេលាម៉ោង២១និង៣០នាទីយប់ កាលពីថ្ងៃទី២៤ ខែកក្កដា ឆ្នាំ២០២១នេះ បានបង្រ្កាបនាវាមួយគ្រឿងដឹកជនជាតិចិន លួចឆ្លងដែនខុសច្បាប់ចូលមកប្រទេសកម្ពុជា ក្នុងភូមិសាស្រ្តកោះរ៉ុងសន្លឹម ក្រុងកោះរ៉ុង ខេត្តព្រះសីហនុ។ កម្លាំងជំនាញឃាត់ខ្លួនបានមនុស្ស ៣៨នាក់ ក្នុងនោះជនជាតិចិន៣៦នាក់ (ស្រី ១នាក់) និងជនជាតិខ្មែរ២នាក់ (កម្មករ)៕