Khmer suport khmer cc time

ចិន បញ្ជាក់ថាជំនួបត្រីភាគីជាប្រវត្តិសាស្រ្ត ទីន-ស៊ី-ត្រាំ នឹងធ្វើឡើងនៅថ្ងៃព្រហស្បតិ៍នេះ

អន្តរជាតិ
/
អ្នកយកព័ត៌មាន:
កូ រដ្ឋា | Ratha KO
/
គំនូររចនាប័ទ្ម Pop Art ថ្មីមួយដែលមានចំណងជើងថា «Shenzhen 26» របស់វិចិត្រករជនជាតិរុស្ស៊ី Alexey Sergienko ដែលបង្ហាញរូបប្រធានាធិបតីសហរដ្ឋអាមេរិក លោក ដូណាល់ ត្រាំ, ប្រធានាធិបតីរុស្ស៊ី លោក វ្ល៉ាឌីមៀ ពូទីន និងប្រធានាធិបតីចិន លោក ស៊ី ជីនពីង បង្កើតឡើងដើម្បីឧទ្ទិសដល់កិច្ចប្រជុំកំពូលនៃវេទិកាសហប្រតិបត្តិការសេដ្ឋកិច្ចអាស៊ី-ប៉ាស៊ីហ្វិក (APEC) ដែលនឹងប្រព្រឹត្តទៅនៅទីក្រុងសិនជិន (Shenzhen) ប្រទេសចិននោះ ត្រូវបានដាក់បង្ហាញនៅទីក្រុងសាំងពេទឺប៊ឺគ ប្រទេសរុស្ស៊ី កាលពីថ្ងៃទី ១២ ខែវិច្ឆិកា ឆ្នាំ ២០២៦។ (រូបភាព៖ Reuters/Andrei Bok)

ប៉េកាំង៖ ក្រសួងការបរទេសចិន បានប្រកាសបញ្ជាក់ជាផ្លូវការនៅថ្ងៃចន្ទ (ទី១៦ ខែវិច្ឆិកា) នេះថា ប្រធានាធិបតីចិន លោក ស៊ី ជីនពីង (Xi Jinping) នឹងជួបប្រជុំជាមួយប្រធានាធិបតីសហរដ្ឋអាម៉េរិក លោក ដូណាល់ ត្រាំ (Donald Trump) និងប្រធានាធិបតីរុស្ស៊ី លោក វ្ល៉ាឌីមៀ ពូទីន (Vladimir Putin) នៅក្នុងកិច្ចប្រជុំកំពូលត្រីភាគីលើកដំបូងបង្អស់របស់មេដឹកនាំទាំងបី នៅថ្ងៃព្រហស្បតិ៍ ទី១៩ ខែវិច្ឆិកា ក្នុងទីក្រុងសិនជិន (Shenzhen)។

យោងតាម CNA កិច្ចប្រជុំជាប្រវត្តិសាស្ត្រនេះ ដែលត្រូវបានបញ្ជាក់រួចមកហើយដោយទាំងសេតវិមាន និងវិមានក្រឹមឡាំង នឹងប្រព្រឹត្តទៅនៅក្រៅកិច្ចប្រជុំកំពូលនៃមេដឹកនាំវេទិកាសហប្រតិបត្តិការសេដ្ឋកិច្ចអាស៊ី-ប៉ាស៊ីហ្វិក (APEC) ដែលរៀបចំឡើងនៅថ្ងៃពុធ និងថ្ងៃព្រហស្បតិ៍សប្តាហ៍នេះ។ មន្ត្រីអាម៉េរិក បានបញ្ជាក់ថា លោកប្រធានាធិបតី ត្រាំ គ្រោងនឹងលើកយកបញ្ហាការកាត់បន្ថយឃ្លាំងអាវុធនុយក្លេអ៊ែរ និងជម្លោះជាមួយប្រទេសអ៊ីរ៉ង់ មកពិភាក្សានៅក្នុងជំនួបនេះ ប៉ុន្តែទំនងជានឹងមិនលើកឡើងអំពីសង្គ្រាមរបស់រុស្ស៊ីនៅអ៊ុយក្រែននោះទេ។

ជាមួយគ្នានេះដែរប្រធានាធិបតីអាល្លឺម៉ង់ លោក ហ្វ្រែង-វ៉ាល់ធើរ ស្ទីនម៉ៃយ័រ (Frank-Walter Steinmeier) បានបង្ហើបប្រាប់បណ្តាញផ្សព្វផ្សាយ ARD ថា នៅក្នុងជំនួបមួយនាពេលថ្មីៗនេះ លោក ស៊ី ជីនពីង បានបង្ហាញអាការៈមិនពេញចិត្តចំពោះលទ្ធភាពនៃការពិភាក្សាបញ្ហាអ៊ុយក្រែននៅក្នុងវេទិកាត្រីភាគីនេះ ដោយលោក ស៊ី បានសង្កត់ធ្ងន់ថា នេះគឺជាជម្លោះនៅអឺរ៉ុប ដែលទាមទារឱ្យមានការចូលរួមពីភាគីអឺរ៉ុបនៅតុចរចា។

ជុំវិញបញ្ហារំសាយអាវុធនុយក្លេអ៊ែរ ទីក្រុងប៉េកាំងនៅតែរក្សាជំហរទទូចជាយូរមកហើយថា សហរដ្ឋអាម៉េរិក និងរុស្ស៊ី ដែលជាមហាអំណាចនុយក្លេអ៊ែរធំជាងគេទាំងពីរ ត្រូវតែកាត់បន្ថយឃ្លាំងអាវុធដ៏ធំសម្បើមរបស់ខ្លួនជាមុនសិន មុននឹងចិនយល់ព្រមចូលរួមក្នុងកិច្ចចរចាគ្រប់គ្រងអាវុធនុយក្លេអ៊ែររបស់ខ្លួន៕

Khcct banner

អត្ថបទទាក់ទង