ម៉ូស្គូ៖ រុស្ស៊ីបានច្រានចោលសេចក្តីរាយការណ៍របស់ប្រព័ន្ធផ្សព្វផ្សាយមួយចំនួនអំពីករណីស្លាប់ទី ២ នៃជំងឺប៉េស្តប្រភេទប៉ះពាល់សួត (pneumonic plague) នៅតំបន់ស៊ីបេរី លោក Dmitry Peskov អ្នកនាំពាក្យវិមានក្រឹមឡាំង បានប្រាប់អ្នកសារព័ត៌មានកាលពីថ្ងៃពុធថា «ព័ត៌មានភាគច្រើនលើសលប់ដែលប្រព័ន្ធផ្សព្វផ្សាយបានចុះផ្សាយទាក់ទងនឹងស្ថានភាពនេះ គឺជាព័ត៌មានមិនពិត» លោកអះអាងថាព័ត៌មានស្តីពីករណីសង្ស័យទាំងនេះ គួរតែទទួលបានពីសេចក្តីថ្លែងការណ៍ផ្លូវការរបស់ស្ថាប័នត្រួតពិនិត្យសុខភាពរុស្ស៊ី គឺ Rospotrebnadzor។
ស្ថាប័នត្រួតពិនិត្យសុខភាពរបស់រុស្ស៊ីបាននិយាយថា មិនមានការឆ្លងណាមួយត្រូវបានរកឃើញក្នុងចំណោមបុគ្គលិកនោះទេ បន្ទាប់ពីបុគ្គលិកម្នាក់នៃវិទ្យាស្ថានស្រាវជ្រាវជំងឺប៉េស្តបានស្លាប់ដោយសារជំងឺរលាកសួត។ ប្រភពដើមនៃជំងឺនេះនៅតែមិនទាន់ដឹងច្បាស់នៅឡើយ ដែលបង្កឱ្យមានការព្រួយបារម្ភជាអន្តរជាតិថា ករណីនេះអាចពាក់ព័ន្ធនឹងជំងឺប៉េស្ត។
គួរកត់សម្គាល់ថាកាលពីថ្ងៃអាទិត្យ រុស្ស៊ីបានទទួលស្គាល់ថា ស្ត្រីម្នាក់អាយុ ២៨ ឆ្នាំ ដែលបម្រើការនៅវិទ្យាស្ថានស្រាវជ្រាវជំងឺប៉េស្តមួយកន្លែងក្នុងទីក្រុង Irkutsk តំបន់ស៊ីបេរី បានស្លាប់បន្ទាប់ពីត្រូវបានគេធ្វើរោគវិនិច្ឆ័យថាមាន «ជំងឺរលាកសួតដែលមិនដឹងពីមូលហេតុច្បាស់លាស់» ដែលបង្កឱ្យមានការព្រួយបារម្ភជាសកលចំពោះករណីសង្ស័យថាជាជំងឺប៉េស្ត។សហរដ្ឋអាម៉េរិក សហភាពអឺរ៉ុប និងអង្គការសុខភាពពិភពលោក (WHO) សុទ្ធតែបានអំពាវនាវឱ្យរុស្ស៊ីមានតម្លាភាពអំពីស្ថានភាពនេះ៕
