ភ្នំពេញ៖សម្តេច ហ៊ុន សែន ប្រធានព្រឹទ្ធសភាកម្ពុជា និងជាអតីតនាយករដ្ឋមន្ត្រីកម្ពុជាជិត៣០ឆ្នាំ បានចេញសារទម្លាយពីរឿងដែលសម្តេច ធ្លាប់បានស្នើសុំគណៈអចិន្ត្រៃយ៍ គណបក្សប្រជាជនកម្ពុជា ឈប់ធ្វើជា «នាយករដ្ឋមន្ត្រី» ក្រោយឈ្នះឆ្នោតឆ្នាំ ១៩៩៨។
យោងតាមបណ្តាញសង្គមផ្លូវការ សម្តេច ហ៊ុន សែន បានថ្លែងរម្លឹកពីថ្ងៃខួបលើកទី ២៨ឆ្នាំនៃការប៉ុន ប៉ងធ្វើឃាតសម្តេច ពីសំណាក់អ្នកនយោបាយ កាលពីថ្ងៃទី ២៤ កញ្ញា ១៩៩៨។តែមិនស្លាប់ ហើយក្លាយជាពេលដែលសម្តេចយកដៃ ដាក់លើក្បាលដោយនិយាយក្នុងចិត្តថា «ខ្ញុំត្រូវពង្រឹងអំណាចនិងត្រូវបញ្ចប់សង្គ្រាមឲ្យខាងតែបាន»។
សម្តេច បានសរសេរយ៉ាងដូច្នេះថា "តាមពិតក្រោយឈ្នះឆ្នោតឆ្នាំ ១៩៩៨ ខ្ញុំបានស្នើសុំឈប់ធ្វើនាយករដ្ឋមន្ត្រី ដោយមានការប្រជុំគណៈអចិន្ត្រៃយ៍ គណបក្សនៅផ្ទះខ្ញុំនៅតាខ្មៅនាល្ងាចថ្ងៃ២៧កក្កដា១៩៩៨ក្រោមអធិបតីភាព បងជា ស៊ីម ប៉ុន្តែមិនមានថ្នាក់ដឹកនាំណាយល់ព្រមឲ្យខ្ញុំឈប់ធ្វើនាយករដ្ឋមន្ត្រីនោះទេ។ ខ្ញុំគិតថា ខ្ញុំបន្តធ្វើនាយករដ្ឋមន្ត្រីត្រឹមឆ្នាំ ២០០៣ ប៉ុន្តែនៅពេលដែលគេហ៊ាន សម្លាប់ខ្ញុំយ៉ាងឃោឃៅបែបនេះខ្ញុំលើកដៃដាក់លើក្បាលនិយាយក្នុងចិត្តថាត្រូវពង្រឹងអំណាចត្រូវបញ្ចប់សង្រ្គាមនិងត្រូវធ្វើនាយករដ្ឋមន្ត្រីរហូតដល់ពេលឈប់ចង់ធ្វើ"។
សម្តេចបន្តថា "ក្រោយមកខ្ញុំនិយាយថា ថ្ងៃនេះខ្ញុំជានាយករដ្ឋមន្ត្រីថ្ងៃក្រោយខ្ញុំនឹងក្លាយទៅជាឪនាយករដ្ឋមន្ត្រីខ្ញុំពិតជាធ្វើបានមែនគឺហ៊ុន ម៉ាណែតបានក្លាយជានាយករដ្ឋមន្ត្រីជាង៣ឆ្នាំមកហើយតាមរយៈការបោះឆ្នោតនិងស្របតាមរដ្ឋធម្មនុញ្ញ។ចង់ឈប់ធ្វើនាយករដ្ឋមន្ត្រីក្នុងវ័យ៤៦ឆ្នាំតែដល់គេចង់សម្លាប់ត្រូវធ្វើនាយករដ្ឋមន្ត្រី២៥ឆ្នាំទៀតរហូតអាយុ៧១ឆ្នាំទើបឈប់។ អំណាចហ៊ុន សែនមិនទាន់ចប់ទេទាំងជាប្រធានបក្សកាន់អំណាចនិងទាំងជាប្រធានព្រឹទ្ធសភា។ខ្ញុំនឹងបន្តកំដរលេងជាមួយពួក(កំចាត់ត្រកូលហ៊ុន)រហូតពួកនេះអស់ពីផែនដី"។
