កម្ពុជាចាប់ជនជាតិចិន៧នាក់និងរកឃើញថ្នាំញៀនជិត១តោនលួចនាំចូលកម្ពុជានៅម្ដុំកោះឬស្សីខេត្តព្រះសីហនុ

ព្រះសីហនុ៖អាជ្ញាធរកម្ពុជា នៅថ្ងៃទី២៣ ខែកញ្ញា ឆ្នាំ២០២៦ វេលាម៉ោង០០:១០នាទី បានកំណត់មុខសញ្ញា និងកំណត់គោលដៅជាក់លាក់ ហើយបង្ក្រាបបទល្មើសជួញដូរគ្រឿងញៀន និងជួញដូរអាវុធខុសច្បាប់នៅម្ដុំកោះឬស្សី ក្នុងភូមិសាស្ត្រដែនសមុទ្រខេត្តព្រះសីហនុ។ក្នុងប្រតិបត្តិការនោះ ចាប់ជនជាតិចិន៧នាក់និងរកឃើញថ្នាំញៀនជិត ១តោន។

យោងតាមរបាយការណ៍របស់នាយកដ្ឋាននគរបាលការពារព្រំដែនទឹក បានបញ្ជាក់ថា ក្រោយទទួលបានព័ត៌មានសម្ងាត់, កម្លាំងនគរបាលនាយកដ្ឋានការពារព្រំដែនទឹកដឹកនាំបញ្ជាផ្ទាល់ពីលោកឧត្តមសេនីយ៍ឯក ទូច ពលៈ ប្រធាននាយកដ្ឋាន ដោយសហការជាមួយកម្លាំងស្នងការដ្ឋាននគរបាលខេត្តព្រះសីហនុ បានធ្វើការឃាត់ និងធ្វើការចាប់ឃាត់អូប័រ ០១គ្រឿង និងជនជាតិចិន២នាក់។

បើតាមរបាយការណ៍បន្ទាប់ពីបង្ក្រាបបាន កម្លាំងនគរបាលបានបន្តប្រតបត្តិការ ហើយឈានដល់ការឃាត់រថយន្តចំនួន ២គ្រឿង និងចាប់ជនជាតិចិន ៥នាក់ទៀត ព្រមទាំងដកហូតម្សៅសថ្លាសង្ស័យជាសារធាតុញៀន សរុបចំនួន ៤២បាវ (ទម្ងន់ប្រមាណ ៨៤០គីឡូក្រាម)។

ក្រៅពីថ្នាំញៀនដ៏ច្រើននេះ កម្លាំងនាយកដ្ឋាននគរបាលការពារព្រំដែនទឹក បានដកហូតម៉ូតូ ចំនួន៣គ្រឿង, អាវុធវែង ចំនួន ១០ដើម, អាវុធខ្លី ចំនួន ៣៩ដើម (បង់ចំនួន១០៨បង់ គ្រាប់ ចំនួន៧,៩៣៧គ្រាប់ ស៊ីឡាំងសឺ០៨)។បច្ចុប្បន្ន មនុស្ស និងវត្ថុតាងខាងលើ ត្រូវបានប្រគល់ជូនស្នងការដ្ឋាននគរបាលខេត្តព្រះសីហនុ ដើម្បីអនុវត្តនីតិវិធីបន្ត៕