ឧត្តរមានជ័យ៖ ស្លាកស្នាមដែលបន្សល់ទុកពីជម្លោះព្រំដែននាពេលថ្មីៗនេះ មិនត្រឹមតែប៉ះពាល់ដល់សុវត្ថិភាព និងជីវភាពរបស់ប្រជាពលរដ្ឋប៉ុណ្ណោះទេ ប៉ុន្តែក៏បានប៉ះពាល់ដល់ការសិក្សា និងសុខភាពផ្លូវចិត្តរបស់កុមារផងដែរ។ អគារសិក្សាដែលរងការខូចខាតនៅខេត្តឧត្តរមានជ័យ គឺជាភស្តុតាងមួយបង្ហាញពីផលប៉ះពាល់ដែលជម្លោះបានបន្សល់ទុកលើកុមារ និងវិស័យអប់រំ។
ក្នុងសប្តាហ៍នេះ លោកស្រី ដាម៉ាច ម៉ាហា នាយិកាថ្មីនៃយូនីសេហ្វប្រចាំកម្ពុជា បានដឹកនាំក្រុមការងារចុះបេសកកម្មទៅកាន់ខេត្តចំនួន៣ រួមមាន បន្ទាយមានជ័យ ឧត្តរមានជ័យ និងព្រះវិហារ ដើម្បីពិនិត្យមើលវឌ្ឍនភាពនៃកម្មវិធីគាំទ្ររបស់យូនីសេហ្វ សម្រាប់កុមារ និងក្រុមគ្រួសារដែលរងផលប៉ះពាល់ពីជម្លោះ។
ក្នុងបេសកកម្មនេះ យូនីសេហ្វបានបន្តគាំទ្រដល់កិច្ចខិតខំប្រឹងប្រែងស្តារជីវភាព និងពង្រឹងភាពធន់របស់កុមារ និងគ្រួសារ ជាពិសេសតាមរយៈការគាំទ្រដល់ការអប់រំ និងសុខុមាលភាពរបស់កុមារ។
យូនីសេហ្វក៏បានគាំទ្រការបង្កើត «ថ្នាក់រៀនឌីជីថល» (Digital Classroom) ដើម្បីជួយកុមារដែលបានខកខានការសិក្សា អាចបន្តរៀនសូត្រ និងពង្រឹងចំណេះដឹងរបស់ពួកគេឡើងវិញ។ វិធានការនេះមានសារៈសំខាន់ក្នុងការជួយកាត់បន្ថយផលប៉ះពាល់នៃជម្លោះទៅលើការសិក្សារបស់កុមារ។
ក្រៅពីការអប់រំ យូនីសេហ្វក៏បានជួយសម្រួលដល់គ្រួសារដែលងាយរងគ្រោះ ឱ្យទទួលបានសេវាសុខភាពចាំបាច់ អាហារូបត្ថម្ភ ការគាំទ្រសុខភាពផ្លូវចិត្ត ទឹកស្អាត អនាម័យ និងប្រព័ន្ធគាំពារសង្គម។
យូនីសេហ្វ បានបញ្ជាក់ពីការប្តេជ្ញាចិត្តបន្តធ្វើការជាមួយរដ្ឋាភិបាលកម្ពុជា និងដៃគូពាក់ព័ន្ធ ដើម្បីធានាថា កុមារដែលរងផលប៉ះពាល់ពីជម្លោះ អាចទទួលបានការគាំទ្រដែលពួកគេត្រូវការ ស្តារស្មារតីឡើងវិញ បន្តការសិក្សា និងក្រសោបយកចំណេះដឹងដែលបានខកខាន។
ការប្តេជ្ញានេះមានគោលដៅជួយឱ្យកុមារកម្ពុជាដែលរងផលប៉ះពាល់ អាចវិលត្រឡប់ទៅរកការរៀនសូត្រ និងជីវិតប្រចាំថ្ងៃបានប្រសើរឡើង ព្រមទាំងបន្តដើរទៅមុខដោយក្តីសង្ឃឹម សម្រាប់អនាគតរបស់ពួកគេ៕
