ចិន បើកទំព័រប្រវត្តិសាស្ត្រថ្មី រកឃើញ«ប្រភពអ៊ីដ្រូសែនអព្យាក្រឹត»ចំនួន ១៥៦,៤១១ នៅលើផ្ទៃមេឃ

ចិន៖ តេឡេស្កូបវិទ្យុរង្វង់ស្វ៊ែររន្ធកាំប្រាំរយម៉ែត្ររបស់ប្រទេសចិន (FAST) បានរកឃើញប្រភពអ៊ីដ្រូសែនអព្យាក្រឹតចំនួន ១៥៦,៤១១ នៅលើផ្ទៃមេឃជិតពាក់កណ្តាល ដែលជាព្រឹត្តិការណ៍របកគំហើញដ៏ធំមួយក្នុងវិស័យតារាសាស្ត្រវិទ្យុ។ ការរកឃើញនេះ ត្រូវបានបោះពុម្ពផ្សាយជាអត្ថបទក្របមុខក្នុងទស្សនាវដ្ដី Science China Physics, Mechanics & Astronomy និងបានកំណត់តួនាទីរបស់តេឡេស្កូបវិទ្យុ FAST ឱ្យក្លាយជាស្តង់ដារសកលថ្មីក្នុងការស្រាវជ្រាវការស្ទង់មតិអ៊ីដ្រូសែន។

យោងតាមការចេញផ្សាយរបស់ប្រព័ន្ធផ្សព្វផ្សាយរដ្ឋចិន CCTV+ ទិន្នន័យថ្មីនេះហៅថា FASHI DR2 គ្របដណ្តប់លើផ្ទៃក្រឡា ១៩,៥០០ ដឺក្រេការ៉េ ដែលមានទំហំធំជាងទិន្នន័យលើកមុនដល់ទៅបួនដង ជាមួយនឹងភាពប្រាកដប្រជាខ្ពស់ និងកម្រិតភាពច្បាស់ប្រសើរជាងមុន ៣០ភាគរយ ដែលអនុញ្ញាតឱ្យក្រុមអ្នកស្រាវជ្រាវវាស់វែងដង់ស៊ីតេអ៊ីដ្រូសែនក្នុងមូលដ្ឋានដោយភាពជាក់លាក់ស្ថិតិរហូតដល់ ០.៦ភាគរយ ដែលជាការវាស់វែងដ៏ត្រឹមត្រូវបំផុតរហូតមកទល់បច្ចុប្បន្ន។

ទិន្នន័យទាំងអស់ពី FASHI DR2 ត្រូវបានដាក់ឱ្យប្រើប្រាស់ជាសាធារណៈ ដើម្បីឱ្យសហគមន៍វិទ្យាសាស្ត្រសកលចូលរួមក្នុងការស្វែងយល់បន្ថែមអំពីការវិវត្តនៃកាឡាក់ស៊ី អាយុកាលសកលលោក និងការចែកចាយរូបធាតុងងឹត៕