ចិន៖ ក្រុមសង្គ្រោះ និងសម្ភារសង្គ្រោះបន្ទាន់បន្ថែមទៀត ត្រូវបានបញ្ជូនយ៉ាងប្រញាប់ប្រញាល់ទៅកាន់តំបន់រងគ្រោះ បន្ទាប់ពីគ្រោះទឹកភក់បាក់ស្រុតដែលបង្កឡើងដោយការធ្លាក់ផ្ទាំងទឹកកក និងថ្មក្នុងប្រទេសនេប៉ាល់ បានវាយលុកដល់កំពង់ផែព្រំដែនជីឡុង (Gyirong) ក្នុងតំបន់ស្វយ័តស៊ីសាង (Xizang) ភាគនិរតីប្រទេសចិន។ គ្រោះមហន្តរាយកាលពីថ្ងៃទី២៦ ខែសីហានេះ បានបណ្តាលឱ្យមនុស្ស ១៦នាក់បាត់បង់ជីវិត និង៥៤៦នាក់ផ្សេងទៀតបាត់ខ្លួន គិតត្រឹមម៉ោង ១៨:០០នាទីថ្ងៃសៅរ៍។
យោងតាមប្រព័ន្ធផ្សព្វផ្សាយរដ្ឋចិន នាយករដ្ឋមន្ត្រីចិន លោក លី ឈាង បានជំរុញឱ្យកម្លាំងសង្គ្រោះទាំងអស់ខិតខំស្វែងរកអ្នកបាត់ខ្លួន ពង្រឹងប្រព័ន្ធព្រមានទុកជាមុន ព្រមទាំងផ្តល់ការថែទាំមនុស្សធម៌ សំណង និងជំនួយសង្គ្រោះដល់គ្រួសាររងគ្រោះ។ លោកក៏បានសង្កត់ធ្ងន់លើយន្តការសម្របសម្រួលអន្តរជាតិ និងការផ្សព្វផ្សាយព័ត៌មានផ្លូវការឱ្យបានទាន់ពេលវេលា ដើម្បីឆ្លើយតបនឹងក្តីបារម្ភរបស់សាធារណជន។
ជាកិច្ចប្រតិបត្តិការបន្ត ឧទ្ធម្ភាគចក្រសង្គ្រោះបន្ទាន់ត្រូវបានបញ្ជូនទៅកាន់កំពង់ផែជីឡុង ដើម្បីដឹកជញ្ជូនបុគ្គលិក និងសម្ភារ ខណៈក្រុមការងារកំពុងពន្លឿនការសម្អាតផ្លូវជាតិលេខ G216 និងស្តារប្រព័ន្ធទំនាក់ទំនងឡើងវិញ។ ក្រៅពីនេះ អាជ្ញាធរពាក់ព័ន្ធក៏បានកំណត់ចំណុចគ្រោះថ្នាក់ភូមិសាស្ត្រហានិភ័យខ្ពស់ចំនួនប្រាំបី និងកំពុងបន្តការតាមដានយ៉ាងយកចិត្តទុកដាក់បំផុត៕
