ពលរដ្ឋវៀតណាម ប្រមាណជាង១១ម៉ឺននាក់ រកឃើញថាបានស្លាប់ដោយសារ «ជម្ងឺមហារីក»ក្នុងមួយឆ្នាំ

វៀតណាម៖ ប្រទេសវៀតណាម បានកត់ត្រាករណីស្លាប់ដោយសារជំងឺមហារីកប្រមាណ ១១១,០១៥ នាក់ក្នុងមួយឆ្នាំ ជាមធ្យមមានមនុស្សម្នាក់បានស្លាប់រៀងរាល់ ៥ នាទីម្តង ខណៈករណីឆ្លងថ្មីមានរហូតដល់ ១៧៧,៤០៤ ករណី (កើនឡើង ៥៩% បើប្រៀបធៀបនឹង ១៦ ឆ្នាំមុន)។ អត្រាស្លាប់ធៀបនឹងករណីឆ្លងថ្មីនៅវៀតណាមមានខ្ពស់រហូតដល់ ៦៣% (បុរស ៧៤% និងស្រ្តី ៥២%) ដែលតួលេខនេះខ្ពស់ជាងឆ្ងាយបើធៀបនឹងប្រទេសអភិវឌ្ឍន៍ដូចជាអាម៉េរិក អង់គ្លេស និងជប៉ុន (ដែលមានត្រឹម ៣៥-៤០%) ដោយសារតែអ្នកជំងឺភាគច្រើននៅវៀតណាមត្រូវបានរកឃើញជំងឺនៅដំណាក់កាលធ្ងន់ធ្ងរ។នេះបើផ្អែកតាមទិន្នន័យពីភ្នាក់ងារអន្តរជាតិនៃការស្រាវជ្រាវអំពីជំងឺមហារីក (GLOBOCAN 2024)។

យោងតាម កាសែត VN Express ក្នុងចំណោមប្រភេទមហារីកទាំងអស់ មហារីកសុដន់ (២៥,៧១១ ករណី) និងមហារីកសួត (២៣,០៨៥ ករណី) គឺជាជំងឺដែលកើតមានញឹកញាប់ជាងគេ ខណៈមហារីកសួតគឺជាប្រភពនៃការស្លាប់ច្រើនជាងគេបង្អស់រហូតដល់ ២១,៣៤០ ករណី។

បញ្ហាប្រឈមដ៏ធំធេងក្នុងប្រព័ន្ធសុខាភិបាលវៀតណាមរួមមាន៖ កង្វះខាតប្រព័ន្ធចុះបញ្ជីអ្នកជំងឺមហារីកថ្នាក់ជាតិ, កង្វះខាតគ្រូពេទ្យឯកទេសធ្ងន់ធ្ងរ (មានគ្រូពេទ្យព្យាបាលមហារីកតែ ៤.៦ នាក់ប៉ុណ្ណោះក្នុងអ្នកជំងឺថ្មី ១,០០០ នាក់) និងបន្ទុកហិរញ្ញវត្ថុដ៏ធ្ងន់ធ្ងរលើអ្នកជំងឺ ដោយសារថ្លៃព្យាបាលមហារីកសួតអាចអស់រហូតដល់ ១៧០ លានដុង (៦,៥០០ ដុល្លារ) ក្នុងមួយឆ្នាំ ហើយឱសថទំនើបៗភាគច្រើនមិនទាន់មានក្នុងបញ្ជីធានារ៉ាប់រង ឬគាំទ្រត្រឹម ៥០% ប៉ុណ្ណោះ។

ដើម្បីដោះស្រាយវិបត្តិនេះ រដ្ឋាភិបាលវៀតណាមបានដាក់ចេញនូវ សេចក្តីសម្រេចចិត្តការិយាល័យនយោបាយ កាលពីខែកញ្ញា ឆ្នាំ ២០២៥ ដែលប្តេជ្ញាផ្តល់ការពិនិត្យសុខភាព ឬការស្កែនរករោគវិនិច្ឆ័យដោយឥតគិតថ្លៃយ៉ាងហោចណាស់ម្ដងក្នុងមួយឆ្នាំជូនប្រជាពលរដ្ឋគ្រប់រូបចាប់ពីឆ្នាំ ២០២៦ តទៅ ខណៈអ្នកជំនាញបានរំលេចថា ជំងឺមហារីកប្រមាណ ៤០% អាចការពារបានតាមរយៈការកាត់បន្ថយបារី គ្រឿងស្រវឹង និងការចាក់វ៉ាក់សាំងការពារវីរុសថ្លើម និង HPV៕