កម្ពុជាចូលរួមជាមួយប្រទេសជាង១៧០ ដើម្បីកំណត់ទិសដៅអភិបាលកិច្ចបញ្ញាសិប្បនិម្មិតសាកល

ហ្សឺណែវ៖ លោក ជា វ៉ាន់ដេត រដ្ឋមន្ត្រីក្រសួងប្រៃសណីយ៍និងទូរគមនាគមន៍ នាថ្ងៃទី៦ ខែកក្កដា ឆ្នាំ២០២៦ បានចូលរួម “ពិធីសម្ពោធកិច្ចសន្ទនាសកលស្ដីពីអភិបាលកិច្ចបញ្ញាសិប្បនិម្មិត” ជាមួយប្រមុខរដ្ឋ ប្រមុខរដ្ឋាភិបាល រដ្ឋមន្ត្រីទទួលបន្ទុកវិស័យឌីជីថល និងតំណាងមកពី ១៧០ប្រទេស និងអង្គការអន្តរជាតិនានា ប្រមាណ៤០០០នាក់ ។

គណៈវិទ្យាសាស្ត្រឯករាជ្យអន្តរជាតិលើបញ្ញាសិប្បនិម្មិត ដែលមានសមាជិក ៤០រូប ជាអ្នកជំនាញមកពីជុំវិញពិភពលោក បានរាយការណ៍ជូនតំណាងរដ្ឋសមាជិក នូវលទ្ធផលនៃការសិក្សារបស់ខ្លួនអំពីបញ្ញាសិប្បនិម្មិត ដោយបង្ហាញយ៉ាងច្បាស់ថា បញ្ញាសិប្បនិម្មិតកំពុងអភិវឌ្ឍលឿនជាងសមត្ថភាពគ្រប់គ្រង ហើយសមត្ថភាពនេះប្រមូលផ្ដុំក្នុងប្រទេសមួយចំនួនតូច ខណៈផលប៉ះពាល់អាចជះឥទ្ធិពលដល់គ្រប់ប្រទេសជុំវិញពិភពលោក។

គណៈវិទ្យាសាស្ត្រអំពាវនាវឱ្យបណ្ដារដ្ឋសមាជិកធ្វើការសម្រេចចិត្តជានយោបាយឱ្យបានរួសរាន់ ដើម្បីធានាថាបញ្ញាសិប្បនិម្មិតបម្រើប្រយោជន៍របស់មនុស្សជាតិ។ក្នុងនាមតំណាងកម្ពុជា រដ្ឋមន្ត្រី ជា វ៉ាន់ដេត បានថ្លែងដោយផ្ដោតលើចំណុចសំខាន់ៗដូចខាងក្រោម៖

(១) អភិបាលកិច្ចបញ្ញាសិប្បនិម្មិត ត្រូវផ្ដោតលើការគាំទ្រសក្ដានុពលវិជ្ជមាន ដើម្បីជំរុញនវានុវត្តន៍ ពង្រីកលទ្ធភាពប្រើប្រាស់ និងកសាងទំនុកចិត្ត។

(២) ដើម្បីកសាងទំនុកចិត្ត អភិបាលកិច្ចត្រូវឆ្លើយតបនឹងហានិភ័យ ឆ្លើយតបទាន់សភាពការណ៍ និងសំឡឹងមើលទៅមុខ ដោយត្រូវទប់ស្កាត់មុនផលប៉ះពាល់មកដល់ ក្នុងករណីចាំបាច់។

(៣) ស្របតាមនិន្នាការអាស៊ាន កម្ពុជានឹងធ្វើអភិបាលកិច្ចបញ្ញាសិប្បនិម្មិតដោយឈរលើគោលការណ៍ និងចាត់ទុកវិស័យឯកជន គ្រឹះស្ថានអប់រំស្រាវជ្រាវ សង្គមស៊ីវិល និងប្រជាពលរដ្ឋជាដៃគូដ៏សំខាន់។

(៤) សហគមន៍អន្តរជាតិត្រូវសហការលើការកសាងសមត្ថភាពជូននិយ័តករ ចែករំលែកព័ត៌មាន អំពីការវិវឌ្ឍថ្មីៗ និងចែករំលែកបទពិសោធនិយ័តកម្មនិងការតាមដានឧប្បត្តិហេតុបញ្ញាសិប្បនិម្មិត។

(៥) កម្ពុជាអំពាវនាវឱ្យក្រុមហ៊ុនបច្ចេកវិទ្យាសហការយ៉ាងពិតប្រាកដជាមួយបណ្ដារដ្ឋាភិបាល ដើម្បីធ្វើអភិបាលកិច្ចបញ្ញាសិប្បនិម្មិត។

ការចូលរួមរបស់កម្ពុជាក្នុងកិច្ចសន្ទនាសកលនេះ ស្តែងឱ្យឃើញពីការយកចិត្តទុកដាក់ខ្ពស់របស់រាជរដ្ឋាភិបាល ក្នុងការដើរឱ្យទាន់និន្នាការបច្ចេកវិទ្យាពិភពលោក ព្រមទាំងការត្រៀមលក្ខណៈឌីជីថល ប្រកបដោយការទទួលខុសត្រូវ និងសុវត្ថិភាពសម្រាប់ប្រជាជាតិទាំងមូល៕