សមត្ថកិច្ច រកឃើញបារី ១០៦កេស ក្នុងរថយន្ត និងផ្ទះ សង្ស័យពាក់ព័ន្ធករណី«រត់ពន្ធទំនិញ»នៅខេត្តបាត់ដំបង

បាត់ដំបង៖ កម្លាំងសមត្ថកិច្ចស្រុកកំរៀង កំពុងបន្តការស្រាវជ្រាវស្វែងរកជនសង្ស័យ ពាក់ព័ន្ធនឹងករណីរត់ពន្ធ ឬប៉ុនប៉ងរត់ពន្ធទំនិញ (បារី) បន្ទាប់ពីសមត្ថកិច្ចបានរកឃើញបារីសរុបចំនួន ១០៦កេស នៅក្នុងរថយន្ត និងផ្ទះមួយកន្លែង ស្ថិតក្នុងភូមិស្រះទឹកថ្មី ឃុំតាក្រី ស្រុកកំរៀង។ ប្រតិបត្តិការនេះ បន្ទាប់ពីពលរដ្ឋបានផ្តល់រាយការណ៍ព័ត៌មានដល់សមត្ថកិច្ចនាថ្ងៃទី១៨ ខែមិថុនា ឆ្នាំ២០២៦។

តាមរបាយការណ៍របស់សមត្ថកិច្ច នៅថ្ងៃទី១៨ ខែមិថុនា ឆ្នាំ២០២៦ វេលាម៉ោង១០:៥០នាទី ពលរដ្ឋបានផ្តល់ព័ត៌មានថា មានរថយន្តម៉ាក WULING YANGGUANG ពណ៌ស ពាក់ស្លាកលេខ បាត់ដំបង 2C-5762 ចតទុកនៅក្បែរផ្ទះមួយ ដោយពុំឃើញម្ចាស់ស្នាក់នៅ។

ក្រោយទទួលបានព័ត៌មាន កម្លាំងផ្នែកជំនាញបានសហការជាមួយប៉ុស្តិ៍នគរបាលរដ្ឋបាលតាក្រី និងដោយមានការអនុញ្ញាតពីព្រះរាជអាជ្ញា អមសាលាដំបូងខេត្តបាត់ដំបង បានធ្វើការត្រួតពិនិត្យរថយន្តខាងលើ។ ជាលទ្ធផល សមត្ថកិច្ចបានរកឃើញបារីចំនួន ៦៤កេស ដែលត្រូវបានវេចខ្ចប់ក្នុងថង់ប្លាស្ទិកពណ៌ខ្មៅ។ បន្ទាប់មក សមត្ថកិច្ចបានបន្តឆែកឆេរផ្ទះក្បែរនោះ និងបានរកឃើញបារីបន្ថែមចំនួន ៤២កេះទៀត ដែលធ្វើឱ្យបារីដែលរឹបអូសបានមានចំនួនសរុប ១០៦ កេស។

សមត្ថកិច្ចបានឱ្យដឹងថា ម្ចាស់រថយន្ត ឬម្ចាស់ទំនិញ មិនទាន់ស្គាល់អត្តសញ្ញាណនៅឡើយទេ ខណៈដែលជនសង្ស័យបានរត់គេចខ្លួនបាត់មុនពេលសមត្ថកិច្ចចុះដល់ទីតាំង។ បច្ចុប្បន្ន វត្ថុតាងត្រូវបានរក្សាទុកតាមនីតិវិធី ហើយកម្លាំងជំនាញកំពុងបន្តស្រាវជ្រាវ ដើម្បីកំណត់អត្តសញ្ញាណ និងចាប់ខ្លួនជនពាក់ព័ន្ធ យកមកផ្តន្ទាទោសតាមច្បាប់៕