ញូវយ៉ក៖ ក្នុងពេលអញ្ញើញចូលរួមកិច្ចប្រជុំក្រុមប្រឹក្សាសន្តិសុខអង្គការសហប្រជាជាតិដែលមានចិនជាប្រធាន ប្រមុខការទូតកម្ពុជា លោក ប្រាក់ សុខុន បានជួបជាមួយថ្នាក់ដឹកនាំការទូតពីប្រទេសសំខាន់ៗមួយចំនួន ហើយក្នុងនោះក៏មានដែលប្រមុខការទូតថា លោក សីហៈសក្តិ ភួងកេតកែវ។ក្នុងជំនួបជាមួយថៃ ពីជំហរកម្ពុជាក្នុងការត្រៀមខ្លួនរួចជាស្រេច ក្នុងការសហការជាមួយថៃ ដើម្បីអនុវត្តវិធានការនានាសំដៅរកដំណោះស្រាយបញ្ហាព្រំដែនដោយយុត្តិធម៌។ជំហរនេះ ត្រូវបានបន្តគាំទ្របន្ថែមពីមហាអំណាចិន ក្នុងពេលលោក ប្រាក់ សុខុន ជួបជាមួយលោក វ៉ាង់ យី រដ្ឋមន្ត្រីការបរទេសចិន។
ក្នុងជំនួបលោក ប្រាក់ សុខុន បានប្រាប់ទៅកាន់ភាគីថៃថា កម្ពុជាបានត្រៀមខ្លួនរួចជាស្រេច ក្នុងការសហការជាមួយថៃ ដើម្បីអនុវត្តវិធានការនានា ដែលប្រមុខរដ្ឋាភិបាលទាំងពីរបាន ឯកភាពគ្នានៅកោះសេប៊ូ ក្នុងគោលបំណងកសាងទំនុកចិត្តឡើងវិញ និងខិតខំស្វែងរក ដំណោះស្រាយដោយយុត្តិធម៌ និងយូរអង្វែង។
ទាក់ទងព្រំដែនសមុទ្រវិញ លោក ក៏បានអះអាងជាថ្មីថា កម្ពុជាសម្រេចផ្តើមប្រើប្រាស់យន្តការផ្សះផ្សាដោយបង្ខំ (Compulsory Conciliation) ក្រោមអនុសញ្ញាអង្គការសហប្រជាជាតិស្តីពី នីតិសមុទ្រ (UNCLOS) ហើយ លោកបានស្នើឱ្យភាគីថៃ ចូលរួមអនុវត្តឱ្យបានពេញលេញ និង មានប្រសិទ្ធភាព ដោយស្មោះត្រង់ និង ដោយសុច្ឆន្ទៈនូវខ្លឹមសារទាំងមូល នៃ សេចក្តីប្រកាសរួម ចុះថ្ងៃទី២៧ ខែធ្នូ ឆ្នាំ២០២៥។
ក្រោយមកទៀត លោក ប្រាក់ សុខុន បានបន្តជួបជាមួយ លោក វ៉ាង យី រដ្ឋមន្ត្រីការបរទេសចិន។ក្នុងជំនួបនោះ កម្ពុជា និងចិន បានពិភាក្សាអំពីការលើកកម្ពស់ទំនាក់ទំនងទ្វេភាគី និង ស្ថានភាពព្រំដែនខ្មែរ-ថៃ។លោក ប្រាក់ សុខុន បានយកឱកាសនេះ អរគុណចិន ចំពោះកិច្ចខិតខំជំរុញឱ្យមានសន្តិភាពតាមព្រំដែនខ្មែរ-ថៃ និង បានអះអាងជាថ្មីថា កម្ពុជាមានឆន្ទៈធ្វើការជាមួយថៃដើម្បីកាត់បន្ថយភាពខុសគ្នាតាមរយៈការសន្ទនា និង ធ្វើឱ្យទំនាក់ទំនងទ្វេភាគីមានលក្ខណៈធម្មតាបន្តិចម្តងៗ ដោយសង្ឃឹមថានឹងទទួលបានការគាំទ្រពីប្រទេសចិនជាបន្តបន្ទាប់។
លោក វ៉ាង យី ក្នុងនាមប្រមុខការទូតចិន គាំទ្រភាគីទាំងពីរក្នុងការប្រកាន់ខ្ជាប់នូវទិសដៅទូទៅនៃការសន្ទនា ហើយមានឆន្ទៈបន្តដើរតួនាទីវិជ្ជមាន ក្នុងការបង្កើនទំនុកចិត្តគ្នាទៅវិញទៅមក និង កែលម្អទំនាក់ទំនង។លោកថា ចិនគាំទ្រទាំងថៃ និងកម្ពុជា ក្នុងការប្រកាន់ខ្ជាប់នូវការសន្ទនា និង ការពិគ្រោះយោបល់ ការពង្រឹងបទឈប់បាញ់ ការកសាងទំនុកចិត្តគ្នាទៅវិញទៅមកបន្តិចម្តងៗ និង ការដោះស្រាយជម្លោះដោយសន្តិវិធី ហើយចិនមានឆន្ទៈបន្តដើរតួនាទីស្ថាបនាក្នុងរឿងនេះ៕
