វ៉ាស៊ីនតោន៖ ប្រធានាធិបតីអាម៉េរិក លោក ដូណាល់ត្រាំ បានបញ្ជាក់កាលពីល្ងាចថ្ងៃ ព្រហស្បតិ៍ ថាអ៊ីស្រាអែល និងលីបង់ បានយល់ព្រមបន្តបទឈប់បាញ់រវាងអ៊ីស្រាអែល និងហេសបូឡា រយៈពេលបីសប្តាហ៍ទៀត លោកថាកិច្ចប្រជុំរវាងឯកអគ្គរដ្ឋទូតអ៊ីស្រាអែល និងលីបង់ ប្រចាំសហរដ្ឋអាម៉េរិក បានដំណើរការទៅដោយល្អណាស់ និងមានផ្លែផ្កាវិជ្ជមានជាច្រើន។ ការប្រកាសរបស់លោកធ្វើឡើងបន្ទាប់ពីកិច្ចប្រជុំកំពូលកម្រិតខ្ពស់លើកទីពីរ រវាងប្រទេសទាំងពីរបានបញ្ចប់នៅក្នុងសហរដ្ឋអាម៉េរិក ដោយបទឈប់បាញ់ដំបូងរយៈពេល ១០ ថ្ងៃ ដែលចូលជាធរមានកាលពីថ្ងៃសុក្រសប្តាហ៍មុន គ្រោងនឹងផុតកំណត់នៅថ្ងៃចន្ទសប្តាហ៍ក្រោយនេះ។
បើតាមលោកដូណាល់ត្រាំសហរដ្ឋអាម៉េរិកនឹងធ្វើការជាមួយប្រទេសលីបង់ ដើម្បីជួយប្រទេសនេះការពារខ្លួនពីក្រុមហេសបូឡា លោកបន្ថែមទៀតថា លោកទន្ទឹងរង់ចាំជួបផ្ទាល់ជាមួយនាយករដ្ឋមន្ត្រីអ៊ីស្រាអែល លោក Benjamin Netanyahu និងប្រធានាធិបតីលីបង់ លោក Joseph Aounក្នុងពេលឆាប់ៗនេះ។
ឯកអគ្គរដ្ឋទូតប្រចាំប្រទេសលីបង់លោក Michel Issa បានថ្លែងនៅក្នុងការិយាល័យពងក្រពើរបស់លោកត្រាំថាយើងសង្ឃឹមថារួមគ្នាក្រោមការដឹកនាំរបស់លោក យើងអាចធ្វើឱ្យសន្តិភាពរវាងអ៊ីស្រាអែល និងលីបង់នឹងកើតមានឡើងវិញនាពេលអនាគតដ៏ខ្លីខាងមុខនេះ៕
