ថៃ៖រដ្ឋមន្ត្រីការបរទេសថៃ លោក Sihasak Phuangketkeow នៅថ្ងៃទី ១៧ មេសានេះ បានប្រកាសថា ប្រទេសថៃបានត្រៀមខ្លួនរួចជាស្រេច ក្នុងការចរចាជាមួយកម្ពុជា លើបញ្ហាព្រំដែននៃប្រទេសទាំងពីរ និងថែមទាំងបានប្រកាសមិនខ្លាចការចរចានោះទេ។នេះបើយោងតាមការចុះផ្សាយរបស់សារព័ត៌មានថៃ ខៅសត។
លោក Sihasak Phuangketkeow បានគូសបញ្ជាក់ថា ប្រទេសថៃមិនខ្លាចការចរចា ហើយមានឆន្ទៈក្នុងការចូលរួមជាមួយកម្ពុជាលើបញ្ហាព្រំដែន ប៉ុន្តែបានសង្កត់ធ្ងន់ថា ការពិភាក្សាមិនអាចត្រូវបានកំណត់ពេលដោយឯកតោភាគីដោយកម្ពុជានោះទេ។លោក ថែមទាំងបានរិះគន់មកលើកម្ពុជាថាបានដាក់លិខិតជាច្រើនដង ដើម្បីដាក់សម្ពាធដល់ប្រទេសថៃក្នុងការចរចា។
បើតាមប្រមុខការទូតថៃរូបនេះ ថា “វាមិនមែនជាបញ្ហាដែលកម្ពុជាចង់ចរចាទេ ហើយកំណត់កាលបរិច្ឆេទ។ នោះមិនមែនជារបៀបដែលការចរចាធ្វើការទេ វាក្លាយជាសម្ពាធបង្ខំយើងឲ្យចូលរួមតុ”។សម្រាប់លោក Sihasak ថៃបានរក្សាយ៉ាងខ្ជាប់ខ្ជួនថា ការពិភាក្សាគួរតែធ្វើឡើងបន្ទាប់ពីការបង្កើតរដ្ឋាភិបាលថ្មី ដើម្បីអនុញ្ញាតឱ្យមានការតែងតាំងក្រុមចរចាត្រឹមត្រូវសមស្របនឹងស្ថានភាពបច្ចុប្បន្ន។ លោកបានកត់សម្គាល់ថា៖ «មានដំណើរការផ្ទៃក្នុងក្នុងប្រទេសថៃ។ សូម្បីតែមុនពេលរដ្ឋាភិបាលត្រូវបានបង្កើតឡើង ពួកគេចង់បានការចរចា។ យើងបាននិយាយរួចហើយថាយើងត្រូវរង់ចាំ»។
គួរបញ្ជាក់ថា ភាគីកម្ពុជា តាមរយៈគណៈកម្មការចម្រុះខណ្ឌសីមាព្រំដែនគោក (JBC) បន្តស្នើឲ្យមានកិច្ចប្រជុំពិសេសរបស់គណៈកម្មការចម្រុះខណ្ឌសីមាព្រំដែនគោក (JBC) ជាមួយភាគីថៃ បន្ទាប់ពីថៃបានស្នើលើកពេលកិច្ចប្រជុំ ដែលគ្រោងប្រព្រឹត្តទៅកាលពីថ្ងៃ ២៨ ខែធ្នូ ឆ្នាំ២០២៥។កិច្ចប្រជុំទាំងនោះ មានបំណងពិភាក្សាដោះស្រាយបញ្ហាមួយចំនួន ដូចជា រឿងដែលយោធាថៃនៅតែបន្តធ្វើសកម្មភាពរំលោភបំពានបូរណភាពទឹកដី និង អធិបតេយ្យកម្ពុជា ដោយការរាយលួសបន្លា ដាក់ទូកុងទឺន័រ ដោតទង់ជាតិថៃ សាងសង់លេណដ្ឋាន ឈូសឆាយ បំផ្លិចបំផ្លាញលំនៅឋាន និងទ្រព្យសម្បត្តិប្រជាពលរដ្ឋកម្ពុជា។
ក្នុងពិធីបើកការដ្ឋានព្រែកជីកហ្វូណនតេជោ កំណាត់ទី២ កាលពីថ្ងៃទី ១១ មេសា សម្តេច ហ៊ុន ម៉ាណែត ប្រមុខរាជរដ្ឋាភិបាលកម្ពុជា បានដាក់ក្តីរំពឹងថា គណៈកម្មការចម្រុះព្រំដែនប្រទេសទាំងពីរអាចចាប់ផ្តើមអនុវត្តការងារវាស់វែងបានឆាប់រហ័ស តាមស្មារតីដែលបានឯកភាពគ្នាក្នុងសេចក្តីប្រកាសរួម (ចំណុចទី៣) នៅក្នុងកិច្ចប្រជុំគណៈកម្មាធិការព្រំដែនទូទៅ(GBC) កាលពីថ្ងៃទី២៧ ខែធ្នូ ឆ្នាំ២០២៥។
ខ្លឹមសារចំណុចទី៣ដែលកំណត់ថា ភាគីទាំងសងខាងឯកភាពគ្នាថា រាល់ការព្រមព្រៀងក្រោមសេចក្តីប្រកាសរួមនេះ មិនត្រូវធ្វើឱ្យប៉ះពាល់ដល់ការខ័ណ្ឌសីមាព្រំដែន និងព្រំដែនអន្តរជាតិរវាងប្រទេសទាំងពីរនោះទេ។ ភាគីទាំងពីរឯកភាពគ្នាប្រគល់តួនាទីឱ្យគណៈកម្មការចំរុះព្រំដែនបន្តអនុវត្តការងារវាស់វែង និងខ័ណ្ឌសីមាព្រំដែន ឱ្យបានឆាប់រហ័សបំផុត ស្របតាមកិច្ចព្រមព្រៀងដែលមានស្រាប់រវាងប្រទេសទាំងពីរ ដើម្បីសម្រេចបាននូវសន្តិភាពយូរអង្វែងតាមបណ្តោយព្រំដែន៕
.jpg?1776911952)
