អាម៉េរិក៖រដ្ឋមន្រ្តីការបរទេសអាម៉េរិក Marco Rubio នៅថ្ងៃទី ១៤ មេសានេះ បានផ្ញើសារជូនពរដល់ប្រជាពលរដ្ឋខ្មែរ ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ ឆ្នាំ២០២៦ ដោយក្នុងសារនោះ លោកឆ្លៀតពីការសរសើរពីចំណងមិត្តភាពរវាងកម្ពុជា និងអាម៉េរិក និងថែមទាំងរំពឹងថា នឹងរីកចម្រើននៅពេលដែលភាពជាដៃគូទ្វេភាគីរបស់យើងរីកចម្រើន។
ក្នុងសារនោះ Marco Rubio បានថ្លែងថា “ក្នុងនាមសហរដ្ឋអាម៉េរិក ខ្ញុំសូមបួងសួងដល់ព្រះរាជាណាចក្រកម្ពុជា និងប្រជាជនខ្មែរ ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ ថ្ងៃឈប់សម្រាកដ៏រីករាយនេះ គឺជាពេលវេលាមួយដើម្បីគោរពដល់សម្បត្តិវប្បធម៌ដ៏សម្បូរបែបរបស់កម្ពុជា ជួបជុំគ្រួសារ និងមិត្តភក្តិ ហើយមើលទៅដោយក្តីសង្ឃឹមឆ្ពោះទៅឆ្នាំខាងមុខ។
បើតាមលោក Marco Rubio អាម៉េរិកបានឲ្យតម្លៃលើចំណងមិត្តភាពដែលស្ថិតស្ថេរជាមួយប្រទេសកម្ពុជា និង ចំណងមិត្តភាពជាច្រើនរវាងប្រជាជនទាំងពីរ ហើយសង្ឃឹមថាចំណងទាំងនេះនឹងរីកចម្រើននៅពេលដែលភាពជាដៃគូទ្វេភាគីរបស់ប្រទេសទាំងពីររីកចម្រើន និងបង្កើតផលដែលនឹងផ្តល់ផលប្រយោជន៍ដល់ប្រជាជាតិទាំងពីរ៕
.jpg?1776911952)
