អ្នកដាក់ប្រាក់នៅធនាគារ Prince Bank ទទួលប្រាក់សងពេញលេញ ក្រោយដោះស្រាយរួចរាល់តាមផ្លូវច្បាប់

ភ្នំពេញ៖ អ្នកដាក់ប្រាក់បញ្ញើទាំងអស់ នៅធនាគារ ព្រីនស៍ ម.ក (Prince Bank) នៅថ្ងៃទី ២៣ មីនា បាននាំគ្នាទៅបើកប្រាក់សំណង ពេញលេញ បន្ទាប់ពីបំពេញនីតិវិធី និង ផ្ទៀងផ្ទាត់អត្តសញ្ញាណចប់រួចរាល់តាមផ្លូវច្បាប់។ការទូទាត់នេះធ្វើឡើងក្រោយពីធនាគារជាតិនៃកម្ពុជាតែងតាំងក្រុមហ៊ុន Morisonkak MKA ធ្វើជាអ្នកជម្រះបញ្ជីធនាគារ ព្រីនស៍ ម.ក ចាប់ពីថ្ងៃទី២៣ ខែមីនា ឆ្នាំ២០២៦។

តាំងតែពីម្សិលមិញរហូតដល់ថ្ងៃនេះ យើងឃើញក្រុមអតិថិជនដែលបានដាក់ប្រាក់បញ្ញើ នៅក្នុងធនាគារ ព្រីនស៍ បានធ្វើដំណើរទៅកាន់សាខាធនាគារព្រីន ដែលទម្លាក់ស្លាកចោល ដើម្បីទៅដកប្រាក់សំណងរបស់ពួកគេវិញ។អតិថិជន មួយចំនួនសម្តែងនូវសេចក្តីរីករាយ និងអះអាងថា ពួកគេបានទទួលប្រាក់សំណងគ្រប់គ្រាន់ឡើងវិញ។

បើតាមសេចក្ដីប្រកាសរបស់ក្រុមហ៊ុន ម៉ូរីសុនកាក់ អ៊ឹមខេអេ អឌីត-អ៊ឹខោនធីង ឯ.ក (Morisonkak MKA Audit-Accounting Co., Ltd) តែងតាំងដោយធនាគារជាតិនៃកម្ពុជា បានជូនដំណឹងទៅអតិថិជន មកទទួលសំណង ចាប់ពីថ្ងៃទី២៣ ខែមីនា ឆ្នាំ២០២៦ នៅការិយាល័យធនាគារ ព្រីនស៍ ម.ក ដោយភ្ជាប់មកជាមួយឯកសារពាក់ព័ន្ធ។

ការផ្តល់សំណងនឹងត្រូវធ្វើឡើងតាមរយៈ ១. ការផ្ទេរតាមគណនីធនាគារ សម្រាប់អ្នកដាក់ ប្រាក់បញ្ញើដែលបានផ្តល់ព័ត៌មានគណនីធនាគារ និង ២. ការផ្តល់សំណងដោយផ្ទាល់ នៅការិយាល័យ ធនាគារ ព្រីនស៍ ម.ក តាមអាសយដ្ឋានខាងលើ សម្រាប់អ្នកដាក់ប្រាក់បញ្ញើដែលពុំបានផ្តល់ព័ត៌មាន គណនីធនាគារក្នុងពាក្យស្នើសុំទាមទារសំណង៕