អាម៉េរិក៖ រដ្ឋមន្រ្តីក្រសួងសង្រ្គាមអាម៉េរិកលោក ភីត ហេកសេត បានប្រកាសថាសហរដ្ឋអាម៉េរិកបានប្រើប្រាស់មីស៊ីលតូប៉េដូ (Mark 48 torpedo) របស់កងទ័ពជើងទឹកអាម៉េរិកតម្លៃប្រមាណ ៤,២ លានដុល្លារក្នុងការបាញ់កម្ទេចនាវាចម្បាំងរបស់អ៊ីរ៉ង់ដែលមានឈ្មោះថា Iris Dena នៅក្នុងដែនសមុទ្រអន្តរជាតិនៅឆ្នេរសមុទ្រភាគខាងត្បូងរបស់ប្រទេសស្រីលង្កា។ លោក ហេកសេត បានប្រាប់អ្នកយកព័ត៌មាននៅក្នុងសន្និសីទសារព័ត៌មានកាលពីថ្ងៃពុធថា “នាវាមុជទឹកអាម៉េរិកមួយគ្រឿងបានពន្លិចនាវាចម្បាំងអ៊ីរ៉ង់មួយគ្រឿងដែលកំពុងតែមានវត្តមានក្នុងដែនទឹកអន្តរជាតិ”។ លោក ហេកសេត ចាត់ទុកការវាយប្រហារនេះជាការសម្លាប់ដោយស្ងប់ស្ងាត់ និងជោគជ័យបំផុតមួយ លោកថានេះជាការប្រើប្រាស់ មីស៊ីល តូប៉េដូ លើកដំបូងចាប់តាំងពីសង្គ្រាមលោកលើកទី ២ បញ្ចប់។
លោក Thomas Shugart អ្នកស្រាវជ្រាវជាន់ខ្ពស់នៅមជ្ឈមណ្ឌលសន្តិសុខអាម៉េរិក បានប្រាប់ Fox News Digital ថា "មីស៊ីល Mark 48 គឺជាអាវុធប្រឆាំងនាវាដ៏សាហាវបំផុតមួយនៅក្នុងសារពើភ័ណ្ឌរបស់សហរដ្ឋអាមេរិក"។ លោក Shugart បាននិយាយថា មីស៊ីលផ្លោងនេះផ្ទុកក្បាលគ្រាប់ទម្ងន់ ៦៥០ ផោន ហើយត្រូវបានរចនាឡើងមិនមែនដើម្បីវាយប្រហារនាវាដោយផ្ទាល់នោះទេ ប៉ុន្តែដើម្បីបំផ្ទុះនៅក្រោមបាតរបស់នាវា ដោយបង្កើតជាពពុះចំហាយទឹកដ៏ធំមួយដែលបំបែកខ្នងនាវា និងបំបែកវាជាពីរ។ លោកបានបន្ថែមថា មីស៊ីលផ្លោងនេះបានផ្ទុះនៅក្រោមផ្នែកខាងក្រោយនៃនាវាអ៊ីរ៉ង់ ហើយលើកវាឡើងពីលើទឹក ដូច្នេះវាបានលិចក្នុងរយៈពេលប៉ុន្មាននាទីប៉ុណ្ណោះ"។
គួររម្លឹកថា យោធាអាម៉េរិកបានបាញ់ពន្លិចនាវាចម្បាំងអ៊ីរ៉ង់ IRIS Dena នៅក្បែរឆ្នេរសមុទ្រប្រទេសស្រីលង្កា កាលពីល្ងាចថ្ងៃទី ៤ មីនា ដែលបណ្តាលឱ្យនាវិកយ៉ាងហោចណាស់ ៨០ នាក់បាត់បង់ជីវិត។ ប្រតិបត្តិការនេះ បានកើតឡើងស្របពេលដែលប្រព័ន្ធការពារអាកាសរបស់អង្គការណាតូ (NATO) បានបាញ់ទម្លាក់មីស៊ីលបាលីស្ទិករបស់អ៊ីរ៉ង់ដែលហោះសំដៅមកលើទឹកដីតួកគីដោយឆ្លងកាត់ប្រទេសអ៊ីរ៉ាក់ និងស៊ីរី៕
