ភ្នំពេញ៖ អ្នកនាំពាក្យក្រសួងពាណិជ្ជកម្មកម្ពុជា បានស្នើសុំដល់ប្រជាពលរដ្ឋកម្ពុជា ត្រូវបានប្រុងប្រយ័ត្ន និងប្រើប្រាស់«ប្រេងសាំង»ដោយសន្សំសំចៃ ខណៈពេលដែលពិភពលោកបច្ចុប្បន្ន ជាពិសេស តំបន់មជ្ឈិមបូព៌ា ជាតំបន់ប្រេងកំពុងជួបបញ្ហាជម្លោះយោធា។
លោក ប៉ែន សុវិជាតិ អ្នកនាំពាក្យក្រសួងពាណិជ្ជកម្ម បានថ្លែងប្រាប់ ស៊ីស៊ីថាមស៍ ក្រោយពីមានជម្លោះផ្នែកយោធារវាង អាម៉េរិក អ៊ីស្រាអែល និងអ៊ីរ៉ង់ គ្រប់ប្រទេសទាំងអស់លើពិភពលោកសុទ្ធតែប្រុងប្រយ័ត្ន ក្នុងការលក់ចេញប្រេង ហើយតម្លៃប្រេងទៅមុនជៀសមិនផុតពីការឡើងថ្លៃនោះទេ បើសិនជម្លោះនេះនៅតែបន្តកើតមាន។
បើតាម លោក ប៉ែន សុវិជាតិ សព្វថ្ងៃនេះ ប្រភពប្រេងនាំចូលប្រទេសកម្ពុជា គឺបានមកពីប្រទេសសិង្ហបុរី វៀតណាម និងផ្នែកខ្លះមកពីប្រទេសចិន ជាប្រទេស ដែលមិនមែនជាអ្នកផលិតប្រេងធំនៅក្រុមប្រទេសនៅតំបន់មជ្ឈិមបូព៌ានោះទេ ហើយប្រសិនបើប្រទេសទាំងនោះជួបបញ្ហាខ្វះខាតប្រេងក្នុងស្រុកគេ នោះនឹងកាត់បន្ថយការនាំចេញ។មន្ត្រីរូបនេះ បានស្នើសុំដល់ប្រជាពលរដ្ឋកម្ពុជា ត្រូវមានការរឹតត្បឹតខ្លះក្នុងការប្រើប្រាស់ប្រេង ឬប្រើក្នុងករណីណាចាំបាច់។
គួរបញ្ជាក់ថា ជម្លោះយោធានៅតំបន់ដើមបូព៌ា ឈានចូលដល់ថ្ងៃទី៤ហើយ។ជម្លោះនេះ នាំឱ្យច្រកសមុទ្រអកមូហ្ស ដែលជាផ្លូវឆ្លងកាត់នៃនាវាដឹកប្រេង និង ឧស្ម័នដ៏សំខាន់បំផុត ត្រូវបិទខ្ទប់ទាំងស្រុង ហើយក្រុមហ៊ុនដឹកជញ្ជូនផ្លូវសមុទ្រទាំងអស់ សម្រេចផ្អាកចរាចរណ៍នាំឲ្យតម្លៃប្រេងឆៅហក់ឡើងថ្លៃ៕
_1.jpg?1777864565)
