ភ្នំពេញ៖សម្តេច ម៉ែន សំអន ប្រធានក្រុមប្រឹក្សាជាតិរណសិរ្សសាមគ្គី អភិវឌ្ឍន៍មាតុភូមិកម្ពុជា នៅថ្ងៃទី ២២ កុម្ភៈនេះ បានអញ្ជើញសួរសុខទុក្ខ សម្តេច ហោ ណាំហុង ឧត្តមប្រឹក្សាផ្ទាល់ព្រះមហាក្សត្រ និង ជាគណៈអធិបតីកិត្តិយសរណសិរ្សសាមគ្គី អភិវឌ្ឍន៍មាតុភុមិកម្ពុជា នៅគេហដ្ឋានរបស់សម្តេច ស្ថិតក្នុងខណ្ឌចំការមន រាជធានីភ្នំពេញ។ក្នុងជាមួយគ្នានោះ ក៏បានពាំនាំការផ្តាំផ្ញើនឹករលឹកពី សម្តេច ហ៊ុន សែន និងសម្តេចកិត្តិព្រឹទ្ធបណ្ឌិតផងដែរ។
សម្តេច ហោ ណាំហុង ជាប្រមុខការទូតដ៏ឆ្នើមរបស់កម្ពុជាដែល បានចូលរួមលើក កម្ពស់វិស័យការទូតនៅកម្ពុជា ជាមួយបណ្តាប្រទេសជាមិត្ត និង មានកិច្ចសហប្រតិបត្តិការអន្តរជាតិល្អ។សម្តេចបានចូលរួមដង្ហែព្រះរាជកិច្ច និងព្រះរាជតម្រិះ ព្រះករុណា ព្រះបរមរតនកោដ្ឋ ជាទីគោរពសក្ការៈដ៏ខ្ពង់ខ្ពស់បំផុត ក្នុងសម័យសង្គមរាស្ត្រនិយម រហូតដល់ឆ្នាំ១៩៧៥ និងបានបន្តចូលរួមដង្ហែក្នុងការស្វែងរកសុខសន្តិភាពជូនប្រជារាស្ត្រកម្ពុជា។
នៅថ្ងៃទី២៦ ខែឧសភា ឆ្នាំ២០២៥ ព្រះករុណា ព្រះបាទ សម្ដេចព្រះបរមនាថ នរោត្តម សីហមុនី ព្រះមហាក្សត្រនៃកម្ពុជា បានចេញព្រះរាជក្រឹត្យប្រោសព្រះរាជទានគោរមងារ «សម្តេចឥស្សរវិទេសបញ្ញា» ដល់សម្តេច ហោ ណាំហុង។ បច្ចុប្បន្នលោក ហោ ណាំហុង មានអាយុជា ៩០ឆ្នាំ។
ក្នុងជំនួបជាមួយសម្តេច ម៉ែន សំអន សម្តេច ហោ ណាំហុង បានបង្ហាញពីអារម្មណ៍រំភើបរីករាយយ៉ាងខ្លាំង មិនអាចយកអ្វីមកប្រៀបផ្ទឹមបានឡើយ និង សូមសម្តែងនូវការដឹងគុណយ៉ាងជ្រាលជ្រៅចំពោះសម្តេច ហ៊ុន សែន, សម្តេចកិត្តិព្រឹទ្ធបណ្ឌិត សម្តេចហ៊ុន ម៉ាណែត ព្រមទាំងថ្នាក់ដឹកនាំរណសិរ្សគ្រប់លំដាប់ថ្នាក់ ដែលបានអញ្ជើញមកសួរសុខទុក្ខដល់គេហដ្ឋាន នាពេលនេះ៕
