ភ្នំពេញ៖ លោក ឃួង ស្រេង អភិបាល នៃគណៈអភិបាលរាជធានីភ្នំពេញ នៅថ្ងៃទី ១៩ មករានេះ បានជួបជាមួយក្រុមអាជីវករផ្សារដើមគ ដែលលក់ដូរតាម ចិញ្ចេីមផ្លូវ និងទ្រូងផ្លូវ នៅតំបន់ជុំវិញផ្សារដើមគ ដើម្បីពន្យល់ណែនាំឱ្យទៅលក់ដូរនៅផ្សារបោះដុំបន្លែផ្លែឈេី(ផ្សារដេីមគថ្មី) ឬទីតាំងឯកជនសមស្របណាមួយ។
ក្នុងជំនួបនោះ លោក ឃួង ស្រេង បានគូសបញ្ជាក់ពីជំហររបស់រដ្ឋបាលរាជធានីភ្នំពេញ នៅតែបន្តយកចិត្តទុកដាក់និងសម្របសម្រួល ព្រមទាំងធានាដល់ជីវភាពរបស់អាជីវករដែលខ្វះខាតខ្លាំង ដែលមានអង្កររបស់រដ្ឋបាលរាជធានីភ្នំពេញ ជួយទំនុកបំរុងដល់អាជីវករដែលមានផលលំបាកនាពេលដែលផ្លាស់ប្ដូរទៅទីតាំងថ្មី ស្របតាមគោលនយោបាយរបស់រាជរដ្ឋាភិបាលដោយមិនទុកប្រជាពលរដ្ឋម្នាក់ណាចោលនោះទេ។
លោក ឃួង ស្រេង បានសង្កត់ធ្ងន់ថា ការស្នេីសុំបន្តលក់ដូរនៅទីតាំងដដែលនៅលេីចិញ្ចេីមផ្លូវ ទ្រូងផ្លូវនេះ គឺរដ្ឋបាលរាជធានីភ្នំពេញ មិនអាចអនុញ្ញាតជូនបានទេ។ជម្រេីសដ៏ល្អ អាជីវករទៅលក់នៅកន្លែងថ្មី ដែលមានលក្ខខណ្ឌអនុគ្រោះជាច្រេីន ដេីម្បីចូលរួមលេីកកម្ពស់សោភ័ណភាពទីក្រុងឱ្យកាន់តែល្អប្រសេីរសម្រាប់ប្រយោជន៍សាធារណជនជារួម។
គួរបញ្ជាក់ថា អាជ្ញាធររាជធានីភ្នំពេញ នៅថ្ងៃទី ១៨ មករា បានចាប់ផ្តើមរៀបចំលាងសម្អាតអនាម័យ មហាវិថីម៉ៅសេទុង មហាវិថីព្រះមុន្នីរ៉េត ផ្លូវ២៣០ និង តំបន់ជុំវិញពាក់ព័ន្ធផ្សារដើមគ ដើម្បីតៀមរៀបចំជួសជុល និង កែលម្អហេដ្ឋារចនាសម្ព័ន្ធជុំវិញនោះ។ការសម្រេចនេះ ធ្វើឡើងខណៈឱសានវាទនៃការហាមឃាត់លក់ដូរបានចូលជាធរមាន ចាប់ពីថ្ងៃទី ១៨ មករា ឆ្នាំ២០២៦នេះ។
លោកស្រី ដោ សម្ផស្ស អ្នកនាំពាក្យរដ្ឋបាលរាជធានីភ្នំពេញ ទីតាំងផ្សារដើមគថ្មី ក្រុមអាជីវករទទួលបានអត្ថប្រយោជន៍ជាច្រេីនមានជាអាទិ៍ អនុគ្រោះ ពុំមានការបង់ថ្លៃតូប រហូតដល់២ឆ្នាំ ពុំតម្រូវប្រាក់កក់ ហើយក្រោយ ២ឆ្នាំ តម្លៃតូបត្រឹមតែ៣០ដុល្លារ និងប្រេីទឹកភ្លេីង ដោយឥតគិតថ្លៃរហូតដល់៦ខែ។ទីតាំងនេះស្ថិតនៅតាមបណ្តោយ មហាវិថីឈ្នះ-ឈ្នះ ក្នុងសង្កាត់គោករកា ខណ្ឌព្រែកព្នៅ រាជធានីភ្នំពេញ និង ត្រូវប្រសិទ្ធនាមថា មជ្ឈមណ្ឌលពាណិជ្ជកម្ម អាស៊ាន-អន្តរជាតិ ឬផ្សារដើមគរថ្មី៕
