រដ្ឋសភា រៀបចំកម្មវិធីបរិច្ចាគឈាមជួយសង្គ្រោះជីវិតវីរកងទ័ព និងពលរដ្ឋភៀសសឹក ដែលត្រូវការឈាមក្នុងករណីចាំបាច់

ភ្នំពេញ៖ សមាជិករដ្ឋសភាកម្ពុជា នៃសភាវ័យក្មេង ថ្នាក់ដឹកនាំ និងមន្ត្រីនៃអគ្គលេខាធិការដ្ឋានរដ្ឋសភា នៅថ្ងៃទី៣០ធ្នូនេះបានប្រារព្ធពិធីបរិច្ចាគឈាមដោយស្ម័គ្រចិត្តជូនមជ្ឈមណ្ឌលជាតិផ្តល់ឈាម សម្រាប់ជួយសង្គ្រោះជីវិតវីរកងទ័ព និងពលរដ្ឋភៀសសឹក ដែលត្រូវការឈាមក្នុងករណីចាំបាច់។ ពិធីនេះត្រូវបានប្រារព្ធធ្វើឡើងក្រោមអធិបតីភាព លោក សួស យ៉ារ៉ា ប្រធានគណៈកម្មការកិច្ចការបរទេស សហប្រតិបត្តិការអន្តរជាតិ និងព័ត៌មាន (គណៈកម្មការទី៥) នៃរដ្ឋសភា និងជាប្រធានក្រុមសមាជិករដ្ឋសភាកម្ពុជា នៃសភាវ័យក្មេង នៅវិមានរដ្ឋសភា។

លោក សួស យ៉ារ៉ា មានប្រសាសន៍ថា ការបរិច្ចាគឈាមថ្ងៃនេះ មិនមែនធ្វើឡើងខណៈពេលដែលប្រទេសកំពុងមានជម្លោះព្រំដែនជាមួយប្រទេសជិតខាងនោះទេ ប៉ុន្តែគឺជាការធានាដល់ការផ្គត់ផ្គង់ឈាមជារៀងរាល់ថ្ងៃដល់មន្ទីរពេទ្យទូទាំងប្រទេស។ ទន្ទឹមនឹងនេះ លោកបានចាត់ទុកការបរិច្ចាគឈាមថ្ងៃនេះ គឺជាដំណក់ឈាមប្រជាជន ដែលមិនប្រកាន់អាយុ និន្នាការនយោបាយ និងសាសនា ហើយការបរិច្ចាគឈាមនៅថ្ងៃនេះ គឺជាការបង្ហាញពីសាមគ្គីភាពជាមួយវីរយុទ្ធជនជួរមុខ ជាពិសេសការបង្ហូរឈាមរបស់យើងថ្ងៃនេះ មិនស្មើនឹងការបង្ហូរឈាមរបស់វីរយុទ្ធជនយើង ក្នុងបុព្វហេតុការពារបូរណភាពទឹកដី ដែលត្រូវបែកឆ្ងាយពីក្រុមគ្រួសារនោះទេ ក្នុងរយៈកាលនៃការប៉ះទង្គិចដោយអាវុធអស់រយៈពេលបីសប្តាហ៍កន្លងមកនេះទេ។

ប្រធានគណៈកម្មការទី៥ បានថ្លែងកោតសរសើរ និងថ្លែងអំណរគុណយ៉ាងជ្រាលជ្រៅ ចំពោះក្រុមគ្រូពេទ្យទាំងអស់ ដែលបានខិតខំយកចិត្តទុកដាក់ក្នុងការសង្គ្រោះ និងព្យាបាលវីរៈយុទ្ធជន ដែលបានរងរបួសក្នុងការបំពេញភារកិច្ចការពារបូរណភាពទឹកដី និងប្រជាពលរដ្ឋដែលបានរបួស ក្នុងអំឡុងពេលមានជម្លោះប្រដាប់អាវុធ តាមព្រំដែនកម្ពុជា-ថៃ។

ស្របពេលដែលប្រទេសជាតិកំពុងមានតម្រូវការលើសុខមាលភាពផ្លូវកាយ និងផ្លូវចិត្ត តាងនាមប្រធានក្រុមសមាជិករដ្ឋសភាកម្ពុជានៃសភាវ័យក្មេង លោក សួស យ៉ារ៉ា បានដាក់ចេញទិសដៅការងារសំខាន់ចំនួន២ គឺ៖ ទី១- ការបង្ហូរឈាម ដែលជាការបរិច្ចាគឈាមមនុស្សធម៌សង្រ្គោះជីវិត មិនត្រឹមតែជាការបរិច្ចាគពីថ្នាក់ដឹកនាំ និងមន្រ្តីអគ្គលេខាធិការដ្ឋានរដ្ឋសភានោះទេ ក្រុមសមាជិករដ្ឋសភាកម្ពុជានៃសភាវ័យក្មេងនឹងបន្តបេសកកម្មនេះ នៅតាមបណ្តារាជធានី-ខេត្តទូទាំងប្រទេស ដោយសហការជាមួយមជ្ឈមណ្ឌលជាតិផ្តល់ឈាម នៅពេលដែលជាតិយល់ថាចាំបាច់។

លោកបានបន្តទៀតថា ដោយឡែកទិសដៅការងារទី២- ដើម្បីជួយការពារបងប្អូនប្រជាពលរដ្ឋ និងកុមារនៅតាមបណ្តាខេត្តជាប់ព្រំដែនកម្ពុជា-ថៃ ក្រុមសមាជិករដ្ឋសភាកម្ពុជានៃសភាវ័យក្មេង នឹងបង្កើតមូលនិធិកសាងជម្រកសុវត្ថិភាព ជាលេណដ្ឋានបេតុង ជូនប្រជាពលរដ្ឋនៅតាមលំនៅដ្ឋានរបស់ប្រជាពលរដ្ឋដែលមានចំងាយពីព្រំដែន ៥០គីឡូម៉ែត្រ ព្រមទាំងសាងសង់សាលារៀនចល័តធ្វើពីកៅស៊ូតង់ នៅតាមមណ្ឌលសុវត្ថិភាពរបស់ប្រជាពលរដ្ឋភៀសសឹក ដើម្បីកុមារ និងសិស្សបានបន្តការសិក្សា និងចែករំលែកភាពកក់ក្តៅរវាងគ្នា។

សូមជម្រាបជូនថា ស្ថានភាពតម្រូវការឈាមក្នុងឆ្នាំ២០២៤កន្លងមក មជ្ឈមណ្ឌលជាតិផ្តល់ឈាមត្រូវការឈាមមួយប្លោក ដើម្បីជួយសង្គ្រោះជីវិតអ្នកជំងឺរៀងរាល់ ៥នាទីម្តង។ រាជធានីភ្នំពេញ មានតម្រូវការឈាមជាមធ្យម ៣៥០ប្លោក ក្នុង១ថ្ងៃ។ នៅទូទាំងប្រទេស មានតម្រូវការជិត ១៧៩,៣៣២ប្លោក ហើយមជ្ឈមណ្ឌលជាតិផ្តល់ឈាមបានគ្របដណ្តប់ជាង ៧៥% នៃការផ្គត់ផ្គង់ឈាមទូទាំងប្រទេស។ ដោយឡែកការទទួលអំណោយឈាមតាមរយៈសប្បុរសជនដោយស្ម័គ្រចិត្តបានតែ ២២.១% នៃតម្រូវការក្នុងប្រទេសតែប៉ុណ្ណោះ។ បើយោងតាមទិន្នន័យអង្គការសុខភាពពិភពលោក ការបរិច្ចាគឈាមដោយស្ម័គ្រចិត្តត្រូវមាន ៩០% នៃតម្រូវការទើបជាគោលដៅល្អ ស្របតាមនិយាមអន្តរជាតិសម្រាប់ប្រទេសជាតិយើង៕