ក្រុមការងារ​ និងបងប្អូនភៀសសឹកនៅក្រុងរុនតាឯកតេជោសែន រៀបចំដាំដុះបន្លែ«ត្រកួន ស្ពៃ និងផ្ទី»សម្រាប់តម្រូវការស្បៀងដល់ពលរដ្ឋ

សៀមរាប៖ ក្រុមការងារ​ និងបងប្អូនភៀសសឹកនៅក្រុងរុនតាឯកតេជោសែន បានរៀបចំ«ដាំដុះបន្លែ»សម្រាប់បំពេញតម្រូវការចាំបាច់ជាប្រចាំថ្ងៃ លើផ្ទៃដីប្រមាណ ២,៦០០ ម៉ែត្រការ៉េ ចំនួន ៥០ រោង។

ដោយអនុវត្តតាមអនុសាសន៍របស់ លោក ប្រាក់ សោភ័ណ អភិបាល នៃគណៈអភិបាលខេត្តសៀមរាប ក្រុមការងារបានចុះពិនិត្យសណ្ឋានភាពដីនៅសល់ និងស្ថានភាពដាំដុះបច្ចុប្បន្ននៅបរិវេណវត្តទាំងពី​រ​ គឺវត្តជ័យគីរីមុន្នីរង្សី (ហៅវត្តរុន) និងវត្តប្រាសាទចៅស្រីវិបុលកេរ្តិ៍ (ហៅវត្តត្រាច)។ ជាមួយគ្នានេះ បងប្អូនដែលកំពុងភៀសសឹកមកស្នាក់នៅវត្ត បានរៀបចំដីបន្ថែម ដើម្បីដាំបន្លែប្រភេទផ្សេងៗ ដូចជា ត្រកួន ស្ពៃ និងផ្ទី សម្រាប់ទទួលបានផលបន្ថែម ស្របតាមតម្រូវការចាំបាច់ជាប្រចាំថ្ងៃ។

សកម្មភាពនេះ គឺជាការអនុវត្តជាក់ស្តែងតាមការផ្តួចផ្តើម និងបំផុសចលនាដ៏មានន័យរបស់ លោកស្រីបណ្ឌិត ពេជ ចន្ទមុន្នី ហ៊ុន ក្នុងការលើកកម្ពស់ការដាំបន្លែតាមផ្ទះ សាលារៀន វត្តអារ៉ាម និងសហគមន៍ ដើម្បីបង្កើនភាពអាចពឹងផ្អែកលើខ្លួនឯង និងធានាសន្តិសុខស្បៀងសម្រាប់ប្រជាពលរដ្ឋ៕